Tags-Husn

yaad kar vo din ki terā koī saudā.ī na thā
bāvajūd-e-husn tū āgāh-e-rānā.ī na thā

husn kā ek aah ne chehrā niDhāl kar diyā
aaj to ai dil-e-hazīñ tū ne kamāl kar diyā

lafzoñ ke ehtiyāt ne ma.anī badal diye
is ehtimām-e-shauq meñ husn-e-asar gayā

husn is sham.a-rū kā hai gul-rañg
kyuuñ na bulbul jale misāl-e-patañg

but-ḳhāne meñ jaatā hai baḌe shauq se lekin
zāhid ko kahīñ husn-e-butāñ maar na Daale

bārhā ruk ruk ga.ī nabz-e-jahāñ
husn kā jaadū hai kyā chaltā huā

dād-e-jamāl-o-husn sameTūñ bilā-hisāb
milne ke ba.ad mujh se mukarrar milā karo

merī hī nazar 'shā.ir' rusvā hai zamāne meñ
husn-e-sar-e-mahfil par ilzām nahīñ aatā

husn masrūf-e-tajalli-o-ḳhud-ārā.ī hai
vo tamāsha hī nahīñ ḳhud bhī tamāshā.ī hai

husn vo TūTtā nashsha ki mohabbat māñge
ḳhuun rotā hai mire haal pa hañsne vaalā

tuur be-nūr thā muusā ke qadam se pahle
kis ne dekhā hai tire husn ko ham se pahle

ahl-e-nazar kī aañkh meñ husn kī aabrū nahīñ
yaanī ye gul hai kāġhzī rañg hai jis meñ bū nahīñ

kahāñ tak naaz uThā.e āḳhir ai husn
havas tere mizāj-e-ḳhud satā kā

ik album husn jazīroñ kā
ik sarmāya tasvīroñ kā

maiñ apne ishq-e-farāvāñ pe naaz kartā huuñ
mirā kamāl mire husn-e-intiḳhāb meñ hai

ho chaman ke phūloñ kā yā kisī parī-vash kā
husn ke sañvarne meñ der kuchh to lagtī hai

jaan hai mol us kā ai ishq-e-javānī jaan le
naqd husn-e-yūsuf-sānī kā bai.āna huā

ik ḳhvāb-numā tamsīl kā dhundlā aks hai ā.īna-ḳhāne meñ
vo husn dikhā.ī nahīñ detā aur phir bhī nigāh nahīñ haTtī

phir iztirāb-e-shauq meñ ġham se mafar kahāñ
vo husn-e-iltifāt vo husn-e-nazar kahāñ

tere baġhair mahfil-e-dil bhī udaas hai
ai husn-e-nā-shanās tujhe ye ḳhabar kahāñ