Tags-Husn

har-chand duur duur vo husn-o-jamāl hai
ai vus.at-e-nigāh tirā kyā ḳhayāl hai

kyuuñ dekhiye na husn-e-ḳhudā-dād kī taraf
lāzim nazar hai gulshan-e-ījād kī taraf

sūrateñ dhuul ho chukī haiñ magar
husn ke pāsbān haiñ ham log

jo rag-e-abr-o-bād se tā-ba-rag-e-junūñ raheñ
ishq kī vo hikāyateñ husn ke vo gile ga.e

kyā kaheñ kyā husn kā aalam rahā
vo rahe aur aa.ina maddham rahā

kise mālūm husn-e-jalvagar kī kār-farmā.ī
nazar kis se milāte dekhne vaale nazar bhar ke

de rahā hai zakāt-e-husn agar
mire haq se zarā baḌhā kar de

guloñ ko toḌte haiñ sūñghte haiñ pheñk dete haiñ
ziyāda bhī numā.ish husn kī achchhī nahīñ hotī

tū apnī aañkh meñ tāb-e-bahār lā to sahī
jahān bhar meñ haiñ husn-o-jamāl ke mausam

jab kabhī shab ke tilismāt meñ kho jaatā huuñ
yā tire husn kī āġhosh meñ so jaatā huuñ

ham us ke husn-e-suḳhan kī dalīl kyā deñge
vo jitnī baar milā ham se barmalā na milā

qabā-e-husn kī tābish agar ho āñkhoñ meñ
bashar ke dil meñ kabhī tīrgī nahīñ hotī

ham ishq meñ haiñ fard to tum husn meñ yaktā
ham sā bhī nahīñ ek jo tum sā nahīñ koī

husn kī bazm-e-ḳhās meñ jā kar is se ziyāda kyā hogā
koī nayā paimāñ bāñdheñge koī nayā va.ada hogā

shauq ke hāthoñ ai dil-e-muztar kyā honā hai kyā hogā
ishq to rusvā ho hī chukā hai husn bhī kyā rusvā hogā

mas.ale husn ke bhī nāzuk haiñ
ishq hī ke muāmlāt nahīñ

husn se kā.enāt hai 'sāġhar'
ishq buniyād-e-kā.enāt nahīñ

kyuuñ yaad 'shamīm' aa jaate haiñ vo apnī mohabbat ke lamhe
jab ishq ke qisse suntā huuñ jab husn kī bāteñ hotī haiñ

ālam-e-husn-e-sādgī tauba
ishq khā khā ke pech-o-tāb uThā

jab ruḳh-e-husn se naqāb uThā
ban ke har zarra āftāb uThā