Tags-Ibaadat

raat masjid meñ añdherā to bahut thā lekin
yaad bhūlī sī koī rāh-e-ibādat thī mujhe

yaad aatā hai ḳhudā pal pal pal
aisī hālat meñ ibādat kaisī

dast-e-qazā baḌhā hai mirī samt alvidā.a
ai etikāf-e-ishq ibādat tamām-shud

us kī yaad aa.ī hai sāñso zarā āhista chalo
dhaḌkanoñ se bhī ibādat meñ ḳhalal paḌtā hai

ye hijr-e-yār ye pābandiyāñ ibādat kī
kisī ḳhatā kī sazā hai ye zindagī to nahīñ

umr guzrī hai tirī sajda-varī meñ lekin
aaj ham apnī ibādat ke liye jāgte haiñ

vaqt-e-namāz hai un kā qāmat-e-gāh-e-ḳhadañg-o-gāh-e-kamāñ
ban jaate haiñ ahl-e-ibādat gāh-e-ḳhadañg-o-gāh-e-kamāñ

zindagānī kī kaḌī sharteñ haiñ
ye ibādat hai tumhārī ki mire baḳhshe hue dukh jhelo

koī 'beḳhud' kī jānib se zarā samjhā.e vaa.iz ko
ibādat ko farishte haiñ use mai-ḳhvār rahne deñ

ham ahl-e-junūñ meñ bas yahī me.arāj-e-ibādat hai apnī
miltā hai jab un kā naqsh-e-qadam ham shukr kā sajda karte haiñ

tujh tamannā meñ jo ibādat kī
kyā tujhe baḳhsh duuñ savāb us kā

yahī hai farq zāhid aur āshiq kī ibādat meñ
ye apnā sar jhukātā hai vo apnā dil jhukāte haiñ

vo mujassam bhī jo aa jaa.e to dekhūñ na use
merī us but kī ibādat kabhī aisī to na thī

kaisī qanā.at kaisī ibādat hirs-o-havas ke aalam meñ
dil jo pahle ghar thā ḳhudā kā ab shahr-e-asnām huā

dāvar-e-hashr mujhe terī qasam
umr bhar meñ ne ibādat kī hai

lagā hai zamāna ibādat meñ jis kī
vo rahtā kahāñ hai tumheñ kuchh patā hai

hamsā.egī-e-zāhid-e-bad-ḳhū ke ḳhauf se
parvardigār terī ibādat na kar sake

is ek ashk-e-nadāmat pe naaz kar ġhā.er
kahāñ ye baat ibādat-guzār hone meñ

dil ke ma.abūd jabīnoñ ke ḳhudā.ī se alag
aise aalam meñ ibādat nahīñ hogī ham se

baiThnā uThnā nazm-o-adab se
ain ibādat hai un kā honā