Tags-Ibaadat

azaañ ho rahī hai pilā jald saaqī
ibādat kareñ aaj maḳhmūr ho kar

jā-namāzoñ kī tarah nuur meñ ujlā.ī sahar
raat bhar jaise farishtoñ ne ibādat kī hai

maiñ husn kā ek pujārī huuñ hai shā.irī husn kī ik devī
jo fikr-e-suḳhan bhī hotī hai ham-rañg-e-ibādat hotī hai

suntā to hai badan kī ibādat pe āyateñ
aatā nahīñ hai phir bhī kisī ke fareb meñ

is ibādat kī nahīñ koī qazā
sar ko sajde se uThā kar raqs kar

ham to karte the mohabbat bhī ibādat kī tarah
ab khulā 'raḳhshāñ' mohabbat qābil-e-tāzīr hai

nahīñ hote haiñ riyā-kārī ke sajde mujh se
maiñ agar sar na jhukā.ūñ to ibādat samjho

ġhairat meñ siyāsat meñ shujā.at meñ ho mard
himmat meñ muravvat meñ ibādat meñ ho mard

yaad rakhnā bhī ik ibādat hai
kyuuñ na ham un kā hāfiza ho jaa.eñ

mujhe to un kī ibādat pe rahm aatā hai
jabīñ ke saath jo sajde meñ dil jhukā na sake

mohabbat aur ibādat meñ farq to hai naañ
so chhīn lī hai tirī dostī mohabbat ne

kuchh taġhayyur se ḳhauf khāte haiñ
kuchh ibādat kareñ ravānī kī

merī āñkheñ merī jaan
terā ibādat-ḳhāna

mohabbat aur ibādat meñ farq to hai naañ
so chhīn lī hai tirī dostī mohabbat ne

kyuuñ aa.e hosh meñ jo ibādat na kar sake
pīr-e-muġhāñ kī ham se itā.at na ho sakī

koī jiine ko samjhe māya-e-ishrat burā kyā hai
mujhe to ik ibādat zindagī mahsūs hotī hai

sar jhukāne ko hī sajda nahīñ kahte 'dānā'
jis meñ dil bhī na jhuke aisī ibādat mat kar

piye sharāb ibādat-guzār hue ai shaiḳh
magar huzūr ye shāyān-e-bandagī to nahīñ

apne maz.hab ki ibādat kā bharam hai tujh ko
darja pā.egā shahādat kā bharam hai tujh ko

mohabbat meñ hai raaz rāz-e-hayāt
mohabbat se baḌh kar ibādat nahīñ