Tags-Ilm

huā vo but na do din bhī kabhī raam
jahannam meñ tū ai ilm-o-amal paḌ

vo jo chale ga.e unheñ to iḳhtitāmiye ke sab siyāh manzaroñ kā ilm thā
vo pahle aa.e the isī liye vo aqalmand the tumheñ

bahut paḌh kar huā ye ilm ham ko
ki ham kitnā zarā sā jante haiñ

bhaTak rahā huuñ maiñ ġhār-e-tilism ke andar
ki ilm tū ne jahālat se bāñdh rakkhā hai

ilm-o-īmāñ kī tarāvat kā diloñ meñ hai guzār
dho ga.e chashma-e-aḳhlāq se sīnoñ ke ġhubār

nashsha-e-ilm kī ummīd pe jiine vaale
simaT aate haiñ sar-e-shām se piine vaale

thā kabhī ilm aadmī dil aadmī pyaar aadmī
āj-kal zar aadmī qasr aadmī car aadmī

ilm-o-amal se hotī hai kirdār kī parakh
elaan kar rahī hai ye mahzar-ba-kaf havā

fatādgān-e-zamīñ kā buland kar ke alam
falak-nashīnoñ ke parcham jhukā diye ham ne

'atīq' ye hī duā hai ki rahtī duniyā tak
charāg-e-ilm ho raushan ġharīb-ḳhāne meñ

ilm kā dam bharnā chhoḌo bhī aur amal ko bhuul bhī jaao
ā.īna-ḳhāne meñ ho sāhib fikr karo hairānī kī

āgahī ne tirī bātoñ meñ khilāīñ kaliyāñ
ilm ne shakkarīñ lahje meñ nichoḌe añgūr

jabr se nasl baḌhe zulm se tan mel kareñ
ye amal ham meñ hai be-ilm parindoñ meñ nahīñ

jahāñ pe ilm kī koī qadr aur havāla nahīñ
maiñ us zamīn pe paañv bhī rakhne vaalā nahīñ

ilm aur jahl meñ kuchh farq na ho kyā ma.anī
ham bhī bebāk haiñ par ġhair se bebāk nahīñ

ilm bhī āzār lagtā hai mujhe
aadmī aḳhbār lagtā hai mujhe

bas bas ke hazāroñ ghar ujaḌ jaate haiñ
gaḌ gaḌ ke alam lākhoñ ukhaḌ jaate haiñ

alam-ba-dast kahīñ ā.ina-ba-kaf huuñ maiñ
tire ḳhilāf har ik samt saf-ba-saf huuñ maiñ

zulm-o-tashaddud ke shaidā.ī shāyad tujh ko ilm nahīñ
tere bhī sapne TūTeñge mere har ik ḳhvāb ke saath

maiñ añdheroñ kā musāfir huuñ magar ye ilm hai
raat ke zaḳhmoñ kā marham sub.h kā jhoñkā bhī hai