Tags-Ilm

chaar sū ilm ke ḳhazāne haiñ
par bashar āgahī nahīñ paa.e

shamshīr alam kar ke lagā kahne rakhūñ Thor
badnām tū kartā phire hai naam hamārā

mirā adū to thā ilm-ul-kalām kā māhir
mire ḳhilāf zamāne ko bol kar kartā

yuuñ hī aqvām kī taqdīr sañvartī hai 'faroġh'
ne.amat-e-ilm pe kuchh baat chalā.ī jaa.e

maiñ dair o ka.aba meñ DhūñD aayā to maiñ ne paayā ye ilm o irfāñ
maiñ ek insāñ huuñ merī hastī se koī hastī varā nahīñ hai

ilm kī dev-qadī dekh ke Dar lagtā hai
āsmānoñ se ab insān kā sar lagtā hai

ilm bhī ik hijāb hai nādāñ
jāntā hai to jāntā kyā hai

hamārā ilm to marhūn-e-lauh-e-dil hai miyāñ
kitāb-e-aql to bas taaq par dharī huī hai

phail jā.egī in dayāroñ meñ
ilm-o-dānish kī raushnī har-sū

basāratoñ ke alam-dār haiñ yahāñ kuchh log
har ik nazar pe añdherā ġhilāf thoḌī hai

ab ahl-e-ilm meñ tārīkiyāñ haiñ
jahālat meñ saverā ho rahā hai

'akbar' hai ek mahshar-e-ilm-o-ḳhabar dimāġh
shor-e-hayāt ḳhāna-e-bīm-o-rajā meñ dekh

ve hī alam meñ aahoñ ke vaisī hī fauj-e-ashk
ab tak ġham-o-alam kā jo iqbāl hai so hai

kyā jurm thā ye aaj bhī ham par nahīñ khulā
ye ilm hai ki ahl-e-junūñ kushtanī na the

ilm jitnā bhī ho kam paḌtā hai insānoñ ko
rizq jitnā bhī ho baTne ke liye hotā hai

zulmat kī kashtiyoñ ko bhañvar hai ye raushnī
dar khul rahe haiñ dānish-o-ilm-o-ḳhabar ke dekh

sab kī samajh meñ aatā kahāñ hai ye ilm-o-fan
jis ne samajh liyā use vo dīda-var huā

har ilm-o-yaqīñ se bālā-tar tū hai vo sipehr-e-tābinda
suufī kī jahāñ nīchī hai nazar shā.ir kā tasavvur sharminda

terā irfān tū kyā ḳhud ko na pahchān sakā
thā mirā dā.ra-e-ilm-o-ḳhabar hī kitnā

jo ahl-e-ilm haiñ kāñTe haiñ un kī rāhoñ meñ
ab un ko 'tāj' haTnā koī mazāq nahīñ