Tags-Imprisonment

sher meñ saath ravānī ke ma.ānī bhī to bhar
ai 'sadā' qaid tū kuuze meñ samundar kar de

sehan-e-masjid ko kiye jā pāmāl
qaid-e-ā.īn-e-tarīqat mat toḌ

mohabbat ko riyā kī qaid se āzād karnā hai
hameñ phir ārzuoñ kā nagar ābād karnā hai

haa.e ġhazab hai mujh vahshī ko us mausam meñ qaid kiyā
sun jab shor-e-fasl-e-bahārāñ murġh-e-qafas ghabrāte the

tā.ir-e-dil jab ham se gayā phir fā.eda kyā jo pūchheñ 'nazīr'
shoḳh ne us ko zab.h kyā yā qaid rakhā yā chhoḌ diyā

ye dā.ere haiñ tumheñ phir se qaid kar leñge
fanā se nikle to ho jāoge sabāt meñ gum

abhī na toḌā gayā mujh se qaid-e-hastī ko
abhī sharāb-e-junūñ kā nasha bhī maddham hai

kidhar ko jā.ūñ havāoñ kī qaid se chhuT kar
zamīn tañg huī aur rāstā ġhā.eb

rihā kar de qafas kī qaid se ghāyal parinde ko
kisī ke dard ko is dil meñ kitne saal pālegā

insān rakkhe ishq kī nisbat se imtiyāz
yuuñ qaid-e-ḳhvāb-o-ḳhur meñ to har vahsh va tair hai

tum kis kumbe kī maañ ho
reip kī qaid kī baTe hue jism kī

uḌā dī qaid-e-maz.hab dil se ham ne
qafas se tā.ir-e-idrāk niklā

tumhārī ruuh 'bushrā' qaid hai tan ke qafas meñ
ise āzād karnā mo.ajaza āsāñ nahīñ hai

bulbule paanī pe mat samjho havā.eñ qaid haiñ
saañs lene ke liye maujoñ ko laale paḌ ga.e

qaid-e-qafas meñ hasrat-e-parvāz kyuuñ rahe
sayyād jo uḌā de mire bāl-o-par kahīñ

kise ḳhabar thī ki gulchīñ kī qaid meñ ik din
guloñ ke sāmne ḳhud bāġhbāñ paḌā hogā

qaid-e-hastī se kab najāt 'jigar'
maut aa.ī agar hayāt ga.ī

jo us ke hoñToñ kī jumbish meñ qaid thā 'ash.har'
vo ek lafz banā bojh mere shānoñ kā

lagtā hai jaise ghar meñ nahīñ huuñ maiñ qaid huuñ
miltī haiñ roTiyāñ bhī jahāñ par ginī huī

qaid-e-gesū se rihā.ī kā nahīñ hai imkāñ
ḳhushbū-e-zulf-e-pareshāñ nahīñ jiine detī