Tags-Insaan

har ek shaḳhs ko insān hī rakhā ham ne
ki aadmī ko nazar meñ ḳhudā kiyā hī nahīñ

muuD ho jaisā vaisā manzar hotā hai
mausam to insān ke andar hotā hai

be-sa.ī-e-amal ḳhaak hai insān ko jiinā
ye razm-e-gah-e-zīst hai madfan to nahīñ hai

aur to aur ḳhud insān bahā jaatā hai
kitnā pur-haul hai tūfān-e-rivāyāt ai 'josh'

agar insān ban jaate kabhī shaiḳh-o-barahman bhī
to ye ka.aba kahāñ hotā ye but-ḳhāne kidhar jaate

yahāñ insān bo.e jā rahe haiñ
ye jañgal is liye kaaTā gayā hai

kyā batā.eñ aap se kyā hastī-e-insān hai
aadmī jazbāt-o-ehsāsāt kā tūfān hai

ḳhaak se paidā huā ye ḳhaak meñ mil jā.egā
ḳhāk-dān-e-dahr meñ insān kyā hai kuchh nahīñ

jaane kyoñ saare jahāñ kā dard is dil ko milā
is jahāñ meñ ham se achchhe aur bhī insān the

aadmī jab ḳhuun kā pyāsā huā
azmat-e-insān bhī dhokā huā

insān hai be-hayā kuchh aisā
haivāñ ko hijāb aa rahā hai

ḳhudā-e-bartar tirī zamīñ par zamīñ kī ḳhātir ye jañg kyuuñ hai
har ek fat.h-o-zafar ke dāman pe ḳhūn-e-insān kā rañg kyuuñ hai

yuuñ to har insān goyā hai magar
sheva-e-shevā-bayānī aur hai

dekhne meñ to lagte haiñ insān se
be-ḳhabar haiñ sab apnī hī pahchān se

vo bhī insān hai kis kis ko navāzegā 'fuzail'
phuul sī jaan ke pīchhe haiñ bahattar āshiq

ḳhānoñ meñ bhaTaktā nazar aayā mujhe insān
shatranj zamāna kā piyāda to nahīñ hai

agar ulTī bhī ho ai 'mashriqī' tadbīr sīdhī ho
magar ye shart hai insān kī taqdīr sīdhī ho

ḳhud apne jaisā hī insān zindagī māñge
ye kaisā vaqt-e-ḳhudā.ī hai aadmī ke liye

sharm se mar jāoge insān haiñ gar aap ik
kis tarah karte haiñ ye muflis guzar mat dekhiye