Tags-Intezar

na aa.e raah pe vo ijz be-shumār kiyā
shab-e-visāl bhī maiñ ne to intizār kiyā

ġhazab kiyā tire va.ade pe e'tibār kiyā
tamām raat qayāmat kā intizār kiyā

ye aarzū ke sitāre ye intizār ke phuul
chamak rahī haiñ ḳhatā.eñ mahak rahe haiñ gunāh

na pūchh iqbāl kā Thikāna abhī vahī kaifiyat hai us kī
kahīñ sar-e-rāh-guzār baiThā sitam-kash intizār hogā

tire ġham kī umr-e-darāz meñ ka.ī inqalāb hue magar
vahī tūl-e-shām-e-'firāq' hai vahī intizār-e-sahar bhī hai

na harīf-e-jāñ na sharīk-e-ġham shab-e-intizār koī to ho
kise bazm-e-shauq meñ laa.eñ ham dil-e-be-qarār koī to ho

maut kā intizār baaqī hai
aap kā intizār thā na rahā

zamīn-e-ishq pe ai abr-e-e.atibār baras
visāl-e-yār kā bah jaa.e intizār baras

tirī bevafā.ī ke baad bhī mire dil kā pyaar nahīñ gayā
shab-e-intizār guzar ga.ī ġham-e-intizār nahīñ gayā

ik umr kaT ga.ī hai tire intizār meñ
aise bhī haiñ ki kaT na sakī jin se ek raat

ham ahl-e-intizār ke aahaT pe kaan the
ThanDī havā thī ġham thā tirā Dhal chalī thī raat

jo hamāre dekhne ko kabhī aap aa nikalte
vahī aañkh dar pe hotī vahī intizār hotā

shab-e-ġham meñ zindagī kā kise e'tibār hotā
mirī jaan jā chukī thī jo na intizār hotā

maiñ agarche kar bhī chukā raqam idhar ek daftar-e-rañj-o-ġham
magar intizār hai dam-ba-dam mujhe pahle ḳhat ke javāb kā

aayā hai ḳhvāb bhī shab-e-va.ada agar hameñ
āñkheñ khulī rahī haiñ tire intizār meñ

o barq-e-tūr tā-ba-kujā lan-tarāniyāñ
pathrā ga.iiñ haiñ āñkheñ mire intizār meñ

aa.uuñ na aap meñ jo vo aa.e kanār meñ
rakhkhūñ maiñ apnī tarah use intizār meñ

'goyā' kabhī hai yaas kabhī intizār-e-yār
kyā kyā haiñ rañj zindagī-e-musta.ār meñ

aayā kabhī na yaar na aayā maiñ aap meñ
apne aur us ke shikve kiye intizār meñ

tujh bin nahīñ ye jalva-numā shab ko māhtāb
chashm-e-falak safed hue intizār meñ