Tags-Intezar

hai idhar ḳhumār ā.ankhoñ meñ udhar intizār ā.ankhoñ meñ
abhī daur-e-mai-kashī hai duur abhī ban rahe haiñ maiḳhāne

is havā meñ kar rahe haiñ ham tirā hī intizār
aa kahīñ jaldī se saaqī shīsha o sāġhar samet

vo na aa.egā hameñ ma.alūm thā is shaam bhī
intizār us kā magar kuchh soch kar karte rahe

na un kā tarz na merā shi.ār ḳhatm huā
na aa.e vo na mirā intizār ḳhatm huā

āñkhoñ hī āñkhoñ meñ ai 'anjum' kaTī
raat saarī intizār-e-yār meñ

tū hī anīs-e-ġham rahā nāla-e-ġham-gusār-e-shab
yās-pasand jab huā bismil-e-intizār-e-shab

ab nahīñ vaqf-e-intizār raat ko mil gayā nigār
merā karīm-e-kār-sāz ho gayā pardār-e-shab

shauq-e-liqā-e-rū-e-yār chashm-ba-rāh-e-intizār
āh-e-sahar se jā milā dīda-e-ashk-bār-e-shab

vāda-ḳhilāfiyoñ ko taras jā.egā yaqīñ
rātoñ ko intizār kā mausam na aa.egā

ab in hudūd meñ laayā hai intizār mujhe
vo aa bhī jaa.eñ to aa.e na aitabār mujhe

duniyā samajh rahī hai kī us ne bhulā diyā
sach ye hai us ko ab bhī mirā intizār hai

tum aa ga.e ho to kyuuñ intizār-e-shām kareñ
kaho to kyuuñ na abhī se kuchh ehtimām kareñ

jān-levā thiiñ ḳhvāhisheñ varna
vasl se intizār achchhā thā

kisī ke raste pe kaise nazreñ jamā.e rakkhūñ
abhī to karnā mujhe hai ḳhud intizār merā

din ko chhūTā na intizār un kā
shab ko aḳhtar-shumāriyāñ na ga.iiñ

mizhgāñ ne rokā āñkhoñ meñ dam intizār se
uljhe haiñ ḳhaar dāman-e-bād-e-bahār se

yuuñ sañg-e-intizār se kab tak bañdhe raheñ
dīvār-e-nā-rasā.ī hī kyuuñ dekhte raheñ

taras rahe haiñ dil-o-jāñ jo rañg-o-bū ke liye
mire nasīb meñ ik dasht-e-intizār to hai

ham ne aksar tumhārī rāhoñ meñ
ruk kar apnā hī intizār kiyā

hai jis kā intizār palak se falak talak
ab aanā chāhiye use aa jaanā chāhiye