Tags-Intezar

jo tum nahīñ the to ik lutf-e-intizār to thā
tum aa ga.e ho to ab lutf-e-intizār kahāñ

itnā to samajhte the ham bhī us kī majbūrī
intizār thā lekin dar khulā nahīñ rakkhā

ik bulbul-e-asīr se pūchhā meñ kis liye
aane kā fasl-e-gul ke tujhe intizār hai

tire haath se mere hoñT tak vahī intizār kī pyaas hai
mire naam kī jo sharāb thī kahīñ rāste meñ chhalak ga.ī

ham ne dabe-pāñv ūñghte darvāze par dastak dī
jahāñ udāsī der se hamārā intizār kar rahī thii!

maiñ sochtā huuñ mujhe intizār kis kā hai
kivāḌ raat ko ghar kā agar khulā rah jaa.e

lamha lamha shumār kartā huuñ
aap kā intizār kartā huuñ

tum aa ga.e ho tum mujh ko zarā sambhalne do
abhī to nashsha sā āñkhoñ meñ intizār kā hai

tamām raat maiñ zulmāt-e-intizār meñ thā
tamām raat thā mahtāb-e-ārzū raushan

yaqīn chāñd pe sūraj meñ e'tibār bhī rakh
magar nigāh meñ thoḌā sā intizār bhī rakh

marte haiñ intizār meñ us ke
aa bhī jaa.e kahīñ vo yā-allāh

apnī tarah mujhe bhī karegī tamām kyā
taḌpā rahī hai mujh ko shab-e-intizār kyuuñ

va.ada hī va.ada thā na vo aa.e na ā.eñge
ai chashm-e-ārzū hai tujhe intizār kyuuñ

ab ḳhaak uḌ rahī hai yahāñ intizār kī
ai dil ye bām-o-dar kisī jān-e-jahāñ ke the

ye vaqt band darīchoñ pe likh gayā 'qaisar'
maiñ jā rahā huuñ mirā intizār mat karnā

na koī din na koī raat intizār kī hai
ki ye judā.ī bharose kī e'tibār kī hai

kisī intizār-e-nazar meñ hai
koī raushnī kisī baam par

jab bahāreñ bevafā nikleñ to kis ummīd par
intizār-e-gul kī hasrat bāġhbāñ le kar chale

be-ḳhudī le ga.ī kahāñ ham ko
der se intizār hai apnā

dekhā hai kis ne muñh sahar-e-jalva-sāz kā
sab valvale haiñ ek shab-e-intizār tak