Tags-Ishq

laayā hai ishq ne mujhe aise maqām par
ḳhud-āgahī rahī na ḳhudā-āgahī rahī

kuchh ishq thā kuchh majbūrī thī so maiñ ne jīvan vaar diyā
maiñ kaisā zinda aadmī thā ik shaḳhs ne mujh ko maar diyā

vo ishq bahut mushkil thā magar āsān na thā yuuñ jiinā bhī
us ishq ne zinda rahne kā mujhe zarf diyā pindār diyā

mujhe pata hai mohabbat meñ kyā guzartī hai
so tujh se ishq nahīñ tujh se dostī karūñgā

husn kī barq-bāriyāñ tauba
ishq par tāza-kāriyāñ tauba

jī chāhtā hai us but-e-kāfir ke ishq meñ
tasbīh toḌ Dāliye zunnār dekh kar

dāman-e-husn-e-talab zaḳhm kī daulat ke sivā
dard bhī ishq kī jāgīr meñ rakkhā gayā thā

chāhā thā ġharaz maiñ ne ishq aise hī dilbar kā
gar mujh pe bahut guzrā ġham is meñ to kam guzrā

talāsh-e-kaun-o-makāñ hai na lā-makāñ kī talāsh
ye zindagī hai ġham-e-ishq-e-jāvedāñ kī talāsh

junūn-e-ishq kī manzil se vāqif hī nahīñ koī
hamārī chāk-dāmānī pe duniyā muskurātī hai

avval-e-ishq kī saa.at jā kar phir nahīñ aa.ī
phir koī mausam pahle mausam sā nahīñ dekhā

maiñ ye bhī chāhtā huuñ ishq kā na ho ilzām
maiñ ye bhī chāhtā huuñ terī aarzū kī jaa.e

ā.īn-e-ahl-e-ishq kahāñ aur ham kahāñ
ai aah shola-bār na ho ḳhūñ-chakāñ na ho

lāzim hai yaar bhī to ho betāb varna kyā
vo ishq hai ki ranj yahāñ ho vahāñ na ho

nāhaq vo jī jalāte haiñ saudā-e-ishq par
jin ko ye soch hai ki kuchh is meñ ziyāñ na ho

maqsad-e-ishq ham-āhañgī-e-juzv-o-kul hai
dard hī dard sahī dil bū-e-dam-sāz to de

ik zarā ho nasha-e-husn meñ andāz-e-ḳhumār
ik jhalak ishq ke anjām kī āġhāz to de

ishq ik baar mashiyyat ko badal saktā hai
indiya apnā magar kuchh nigah-e-nāz to de

agar hai ishq to phir aisā ishq ho 'bāqar'
vo gungunā.e mujhe aur maiñ gungunā.ūñ use

bismil-e-ishq kuuñ hargiz nahīñ ummīd-e-hayāt
zaḳhm us teġh kā kaarī hai ḳhudā ḳhair kare