Tags-Ishq

tumheñ mujh meñ kyā nazar aa gayā jo mirā ye ruup banā ga.e
vo tamām log jo ishq the vo mire vajūd meñ aa ga.e

kabhī be-kalī kabhī be-dilī hai ajiib ishq kī zindagī
kabhī ġhuncha pe jaañ fidā kabhī gulsitāñ se ġharaz nahīñ

ishq ġham ko ubuur kar na sakā
rāste kārvāñ ke saath chale

ishq kī choT dikhāne meñ kahīñ aatī hai
kuchh ishāre the ki jo lafz-o-bayāñ tak pahuñche

jaane ab husn luTā.egā kahāñ daulat-e-dard
jaane ab kis ko ġham-e-ishq kā yaarā hogā

go ma-e-lutf se ḳhālī nahīñ pindār-e-junūñ
yaañ ġham-e-ishq kā yaarā hai tumhārī ḳhātir

ye ashk manzil-e-āḳhir haiñ ishq kī hamdam
ki in sitāroñ se aage koī nishān nahīñ

ba-pās-e-ehtirām-e-ishq ham ḳhāmosh haiñ varna
pareshāñ kar bhī sakte haiñ pareshāñ ho bhī sakte haiñ

dil pe kab iktifā kare hai ishq
jā.egā jaan bhī ye ġham le kar

us ko bhūle binā koī chāra nahīñ vo hamārā nahīñ
ishq ik baar hai ye dobāra nahīñ vo hamārā nahīñ

ishq nāshād hai ishq barbād hai ishq fariyād hai
is samundar kā koī kināra nahīñ vo hamārā nahīñ

iztirāb-e-dil se be-parda huā yaañ rāz-e-ishq
sūjhtī haiñ vaañ tumheñ har baat meñ tahdāriyāñ

tarīq-e-ishq chhuḌāyā hai tū ne ġhārat-gar
milā hai ḳhizr mujhe rāhzan ke parde meñ

aañkh lalchā.ī huī paḌtī hai jis par merī
ishq us par mirā iz.hār huā chāhtā hai

rahe soz-e-ishq lekin ga.e hosh phir na aa.eñ
vo tajalliyoñ se pur hai tirī chashm kī gulābī

zanjīr kyuuñ na us kī qadam-bos ho bhalā
jo koī tere ishq meñ dīvāna ho gayā

yaañ tak kiyā hai shohra-e-āfāq ishq ne
qissa mirā bhī ḳhalq meñ afsāna ho gayā

ḳhudā ke naam pe dil ko sipurd-e-ishq kiyā
ab is ke ba.ad umīd-e-ma.āl-e-kār nahīñ

tāle.a jagā.e aap ne arbāb-e-ishq ke
yūsuf kā husn ḳhvāb-e-farāmosh ho gayā

uḌtā huuñ ishq meñ lab lālīñ ke ai 'munīr'
goyā sharār ātish-e-ḳhāmosh ho gayā