Tags-Ishq

rasm-e-jahāñ na chhūT sakī tark-e-ishq se
jab mil ga.e to pursish-e-hālāt ho ga.ī

hamārā ishq ravāñ hai rukāvaToñ meñ 'zafar'
ye ḳhvāb hai kisī dīvār se nahīñ ruktā

ho ga.ī hai ġhair kī shīrīñ-bayānī kārgar
ishq kā us ko gumāñ ham be-zabānoñ par nahīñ

jis ne 'dā.ūd' najā nañg ho dīvāna-e-ishq
us kuuñ rusvā.ī-e-sañgsār setī kyā matlab

tere ye jaur kab sahūñ maiñ
gar ishq kā ho na paas mujh ko

ishq-e-pechāñ jo sutūnoñ pe chaḌhī
ghar kī vīrān fazā raqs meñ hai

ishq meñ ham hue na dīvāne
qais kī aabrū kā paas kiyā

nafratoñ kī gard rasta kāTtī har moḌ par
ishq kī ḳhushbū meñ uḌte kū-ba-kū maiñ aur tū

hamāre sāmne se ishq-o-ulfat ko uThā le
ye qisse ham tak aate aate raddī ho chuke haiñ

jis hasīñ se huī ulfat vahī ma.ashūq apnā
ishq kis chiiz ko kahte haiñ tabī.at kaisī

tufta-jānoñ kā ilaaj ai ahl-e-dānish aur hai
ishq kī ātish balā hai us kī sozish aur hai

'bedār' rāh-e-ishq kisī se na tai huī
sahrā meñ qais koh meñ farhād rah gayā

fareb-e-husn hai duniyā mirī nazar ke liye
nigāh-e-ishq nahīñ husn-e-rahguzar ke liye

balā-e-ishq se bismil na rakh umīd-e-najāt
duā-e-sub.h na kar shām-e-be-sahar ke liye

vahāñ phir ishq ke hue matlab
jahāñ hote the sirf ghar tabdīl

ishq ne sauñpā hai kaam apnā ab to nibhānā hī hogā
maiñ bhī kuchh koshish kartā huuñ aap bhī kuchh imdād kareñ

vo ba-zo.am-e-husn haiñ ḳhud-nigar to mujhe bhī naaz hai ishq par
maiñ niyāz-mand sahī magar mujhe 'soz' pās-e-anā bhī hai

har ishq ke manzar meñ thā ik hijr kā manzar
ik vasl kā manzar kisī manzar meñ nahīñ thā

chashm-e-tar se jo ḳhūñ-fishānī hai
nāvak-e-ishq kī nishānī hai

qad-e-mauzūñ ke ishq meñ 'goyā'
raat din shuġhl-e-sher-ḳhvānī hai