Tags-Ishq

us ko hai ishq batānā bhī nahīñ chāhtā hai
aur ye baat chhupānā bhī nahīñ chāhtā hai

kamāl-e-ishq hai 'sāqī' faroġh-e-husn-e-amal
ye rañg-e-sheva-e-ahsan hai dāḳhil-e-hasnāt

ishq aur ishq-e-sho.ala-var kī aag
aag aur ulfat-e-bashar kī aag

ishq kyā shai hai husn hai kyā chiiz
kuchh idhar kī hai kuchh udhar kī aag

bas ab to ishq hai hijr-o-visāl kuchh bhī nahīñ
ye TukḌā ziist kā din meñ hai aur na raat meñ hai

ye ajiib mantiq-e-ishq hai magar is meñ kuchh bhī na ban paḌe
mire dil meñ yaad kisī kī hai mujhe bhūltā koī aur hai

bahār se bhī numāyāñ hai ishq kā kirdār
ye lahlahātā chaman hai ki be-gunāh kā dil

surḳh-rū ishq kī badaulat huuñ
ki maiñ is aag meñ huuñ bachpan se

ġham-e-daurāñ ke masā.ib kā mudāvā kyā hai
ishq bas ishq batāte haiñ batāne vaale

siyahkār the bā-safā ho ga.e ham
tire ishq meñ kyā se kyā ho ga.e ham

ġhair taraf kyūñki nazar kar sakūñ
ḳhauf hai tujh ishq ke jāsūs kā

jo ho gayā so ho gayā ab us ko chhoḌiye
yuuñ kījiye ki ishq kī azmat banī rahe

ai ishq tū ne ḳhuub kiyā baaġh baaġh dil
tā-umr in guloñ kī ye nik.hat banī rahe

husn aur ishq haiñ donoñ kāfir
donoñ meñ ik jhagḌā sā hai

kahte haiñ husn hī kī amānat hai dard-e-ishq
ab kyā kisī ke ishq kā daavā kare koī

dil o nazar meñ hazār iḳhtilāf hoñ lekin
jo ishq hai to phir un ko baham bhī rakhnā hai

qatl karnā to us ko Thiik nahīñ
ishq kī maut hādse meñ ho

hisār-e-jāñ dar-o-dīvār se alag hai miyāñ
ham apne ishq ko hī apnā ghar samajhte haiñ

husn bhī kambaḳht kab ḳhālī hai soz-e-ishq se
sham.a bhī to rāt-bhar jaltī hai parvānoñ ke saath

aql apnoñ se bhī aksar bach ke chaltī hai zarā
ishq hī kambaḳht ho jaatā hai begānoñ ke saath