Tags-Ishq

Dar ye hai khul na jaa.e kahīñ rāz-e-ishq bhī
nibhne lagī hai un se mire rāzdār kī

mumkin nahīñ najāt asīrān-e-ishq ko
ye qaidī vo nahīñ ki jo zindāñ se duur hoñ

maiñ tājirān-e-ishq ke baare meñ kyā kahūñ
in kā junūñ hai garmī-e-bāzār kī tarah

ishq meñ haar ke mar jaanā koī ishq nahīñ
dam-e-āḳhir bhī to bīmār davā karte haiñ

ishq se bach ke kidhar jā.eñge ham
hai ye maujūd jidhar jā.eñge ham

ziist baaqī hai to apnā 'rañgīñ'
naam is ishq meñ kar jā.eñge ham

anā kī jañg ne barbād kar diye rishte
agarche ishq hai to sar jhukā liyā jaa.e

sulagtī ret ke us paar ishq kā dariyā
mire ḳhayāl se paañv jalā liyā jaa.e

ishq-e-butāñ kā diin pe jo kuchh asar paḌe
ab to nibāhnā hai jab ik kaam kar paḌe

jis kī zabāñ meñ ishq ke afsūñ kā hai asar
har harf us kā mauj-e-parī hū-ba-hū huā

ye shīshe dil ke jo bikhre hue haiñ
tumhāre ishq meñ TuuTe hue haiñ

badal gayā ishq kā zamāna kahāñ se pahuñchā kahāñ fasāna
unheñ bhī mujh par zabān aa.ī vahī jo the be-zabāñ se pahle

ishq ik aag kā samundar hai
ye samundar tū paar kar pahle

maat bhī is meñ jiit jaisī hai
ishq meñ dekh, haar kar pahle

musāfir ishq kī manzil sarāpā raaz hotī hai
kahīñ chehre pe gard-e-kārvāñ baaqī na rah jaa.e

koī hasīn hai muḳhtār-e-kār-ḳhāna-e-ishq
ki lā-makāñ hī kī chaukhaT hai āstāna-e-ishq

nigāheñ DhūñDh rahī haiñ dil-e-yagāna-e-ishq
ishāre pūchh rahe haiñ kahāñ hai ḳhāna-e-ishq

phireñge hashr meñ gard-e-dil-e-yagāna-e-ishq
kareñge pesh-e-ḳhudā ham tavāf-e-ḳhāna-e-ishq

na.ī sadā ho na.e hoñTh hoñ nayā lahja
na.ī zabāñ se kahūñ gar kahūñ fasāna-e-ishq

jo maulvī haiñ vo likkheñge kufr ke fatve
sunā.ūñ sūrat-e-mansūr agar tarāna-e-ishq