Tags-Ishq

badle haiñ husn-o-ishq to aqdār bhī na.ī
le kar na.e javāz sitamgar bhī ā.eñge

tauqīr-e-ishq ḳhaak uḌāne se baḌh ga.ī
ye hai ġhalat ki ḳhaak meñ dīvāna mil gayā

ma.alūm ham ne kar liye asrār-e-husn-o-ishq
taqdīr se agar koī dīvāna mil gayā

rakh lī ḳhudā-e-ishq ne josh-e-junūñ kī sharm
ghar se nikalte hī mujhe vīrāna mil gayā

tujh ko apnā hī liyā āḳhir nigār-e-ishq ne
ai urūs-e-chashm le motī kā gahnā aa gayā

ishq mahv-e-ġham-e-zindagī ho gayā husn madhosh-e-ishva-tarāzī rahā
ahl-e-dil hosh meñ aa chuke haiñ magar hai vahī ālam-e-dil-barāñ aaj tak

ishq-o-talab kī raah meñ bād-e-havas bhī tez thī
maiñ ne jalāyā rāt-bhar kar ke ḳhudā ḳhudā charāġh

dil ko na pūchh mārka-e-husn-o-ishq meñ
kyā jāniye ġharīb kahāñ kaam aa gayā

ye kyā maqām-e-ishq hai zālim ki in dinoñ
aksar tire baġhair bhī ārām aa gayā

kabhī ishq karo aur phir dekho is aag meñ jalte rahne se
kabhī dil par aañch nahīñ aatī kabhī rañg ḳharāb nahīñ hotā

chashm-e-yaqīñ se dekhiye jalva-gah-e-sifāt meñ
husn hī husn hai tamām ishq kī kā.enāt meñ

aise bhī vaqt aa.e haiñ ishq kī vārdāt meñ
mastiyāñ jhuum jhuum uThīñ dīda-e-kā.ināt meñ

ishq ko niiñd aa ga.ī vaqt pe os paḌ ga.ī
apne junūñ ke dasht meñ dhuup javāñ hai aaj bhī

kuchh ḳhabar bhī ho na paa.ī is dayār-e-ishq meñ
kaun yūsuf ho gayā kis ko zuleḳhā kar diyā

ġham nahīñ lā-hāsilī kā ishq kā hāsil hai ye
ai hisāb-e-zindagī tujh ko to puurā kar diyā

hai guzrī kyā se kyā ishq-o-mohabbat ke tanāzur meñ
mohabbat ḳhārij-az-sūd-o-ziyāñ ma.alūm hotī hai

bose kā likh ke nusḳha yāqūtī-e-laboñ se
bīmār-e-ishq terā hai be-davā davā kar

ishq par zor nahīñ hai ye vo ātish 'ġhālib'
ki lagā.e na lage aur bujhā.e na bane

jab marīz-e-ishq ko koī davā aa.ī na raas
dard hī ko dard kī āḳhir davā ham ne kahā

gurez ishq se lāzim sahī magar 'rif.at'
jo dil hī baat na maane to kyā kiyā jaa.e