Tags-Ishq

junūn-e-ishq kā jo kuchh huā anjām kyā kahiye
kisī se ab ye rūdād-e-dil-e-nākām kyā kahiye

adā-e-bad-gumānī bhī sarisht-e-ishq hai lekin
ye kyuuñ kar ban ga.ī minjumla-e-ilzām kyā kahiye

raheñge hashr tak mamnūn-e-ehsān-e-dil-āzārī
ḳhulūs-e-ishq par ye qīmtī in.aam kyā kahiye

āvārgān-e-ishq kā maskan na pūchhiye
paḌ rahte haiñ vahīñ pe jahāñ raat ho ga.ī

aaj bhī qāfila-e-ishq ravāñ hai ki jo thā
vahī miil aur vahī sañg-e-nishāñ hai ki jo thā

aaj phir ishq do-ālam se judā hotā hai
āstīnoñ meñ liye kaun-o-makāñ hai ki jo thā

ishq afsurda nahīñ aaj bhī afsurda bahut
vahī kam kam asr-e-soz-e-nihāñ hai ki jo thā

aaj bhī said-gah-e-ishq meñ husan-e-saffāk
liye abrū kī lachaktī sī kamāñ hai ki jo thā

raat bhar husn par aa.e bhī ga.e sau sau rañg
shaam se ishq abhī tak nigarāñ hai ki jo thā

mo.ajiza ishq kā ye bhī hai zamāne vaalo
mere āñgan meñ hue phuul tumhāre patthar

ye ishq-o-vafā kī bāteñ haiñ pūchhe koī 'shañkar' ke dil se
vo sāmne jab aa jaate haiñ har saañs ġhazal-ḳhvāñ hotā hai

ishq kī ibtidā hai tum se agar
mujh pe kyuuñ intihā nahīñ karte

ishq meñ radd-o-badal thā mushkil
husn kī kitnī adā.eñ huiiñ rad

tumhāre ishq se 'tābāñ' huā hai shahar meñ rusvā
tum us ke haal se ab tak nahīñ mahram miyāñ-sāhib

ishq sunte the jise ham vo yahī hai shāyad
ḳhud-baḳhud dil meñ hai ik shaḳhs samāyā jaatā

aayā hai magar ishq meñ dildār hamārā
har tan meñ huā jaan har ik jism kā nyārā

behad hai 'alīm' ishq ke ta.alīm kā tūmār
paayā nahīñ kui ishq ke dariyā kā kinārā

ye ishq kī me.arāj hai yā un kā karam hai
har vaqt mire sāmne tasvīr-e-sanam hai

ai dost tire ishq meñ pahuñchā huuñ yahāñ tak
āñkhoñ meñ sanam-ḳhāna hai siine meñ haram hai

mustahlak us ke ishq ke jāneñ haiñ qadar-e-marg
īsā-o-ḳhizr ko hai maza kab vafāt kā