Tags-Ishq

kahte haiñ jise husn vo hai shama-e-jahāñ-tāb
kahte haiñ jise ishq vo parvāna hai us kā

har bure vaqt ke afa.āl badal detā hai
ishq dānāoñ ke aqvāl badal detā hai

hazār baar husn ḳhud hī nādim-e-jafā huā
agarche ishq ne bhī kiiñ shikāyateñ kabhī kabhī

ye faiz-e-ishq thā ki huī har ḳhatā muaaf
vo ḳhush na ho sake to ḳhafā bhī na ho sake

mudda.ī dil ishq ā.īn-o-adālat bazm-e-nāz
dīd-bāzī jurm mujrim aañkh hai jurmāna ham

tujh ko bhī ishq-e-butāñ kā maza kuchh ho ma.alūm
tere palle hoñ agar dām-o-diram ai nāseh

zulmat-e-shab kī tarah nūr-e-shabistāñ se alag
ġham-e-daurāñ se alag ishq-e-nigārāñ se alag

garche hai tarz-e-taġhāful parda-dār-e-rāz-e-ishq
par ham aise kho.e jaate haiñ ki vo pā jaa.e hai

ham pe jab ishq jatāne kā savāl aatā hai
ham tirī maañg meñ sindūr sajā dete haiñ

ye ishq agar aisā pur-asrār na hotā
mansūr kabhī koī sar-e-dār na hotā

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

ġhībat-e-dahr bahut gosh-e-gunahgār meñ hai
kuchh ġham-e-ishq ke ausāf-e-karīmāna sunā

sho.ala-e-ishq se chhalkā de mire shīshe ko
aur betāb ko betāb banā de saaqī

mirā ishq hai bas itnā ki jagā.eñ koī fitna
tire hoñT band ho ke mirī ḳhvāhishāt khul ke

ishq aur mushk chhupte nahīñ haiñ kabhī
is haqīqat se vāqif haiñ ham tum sabhī

maiñ dil-zada huuñ agar dil-figār vo bhī haiñ
ki dard-e-ishq ke ab da.avedār vo bhī haiñ

gar yahī dīvāngī hai rahravān-e-ishq kī
manzil-e-maqsūd gard-e-kārvāñ ho jā.egī

lazzat-e-ishq ilāhī miT jaa.e
dard armān huā jaatā hai

bāġh-e-ālam meñ ġham-e-ishq kā phal rāhat hai
mojib-e-izz-o-karāmat huī zillat merī

paas mere jo na aa.e koī shikva kyā hai
kartī hai be-kasī-e-ishq rifāqat merī