Tags-Ishq

dostī ḳhvāb hai aur ḳhvāb kī ta.abīr bhī hai
rishta-e-ishq bhī hai yaad kī zanjīr bhī hai

ye to ab ishq meñ jī lagne lagā hai kuchh kuchh
is taraf pahle-pahal gher ke laayā gayā maiñ

kabhī salīb kabhī zahr aur kabhī ḳhanjar
sabāt-e-ishq mile haiñ tujhe mile kitne

huī hai ishq meñ tash.hīr chāk-dāmāñ kī
ye dekhiye to ki chāk-e-jigar sile kitne

maiñ marīz-e-ishq huuñ chāragar tū hai dard-e-ishq se be-ḳhabar
ye taḌap hī us kā ilaaj hai ye taḌap na ho to shifā na ho

jiine kī fikr kījiye aur peT kā ḳhayāl
mauqūf kiije ishq kā āzār āj-kal

chamkā hai kuchh vo jalva-e-ruḳh ho ki dāġh-e-ishq
donoñ diloñ meñ ek na ik mubtalā huā

ishq se log manā karte haiñ
jaise kuchh iḳhtiyār hai apnā

ulTī dekheñ ishq kī rāheñ
hañsnā paḌe jab ronā chāheñ

ham ne diye haiñ ishq ko tevar na.e na.e
un se bhī ho ga.e haiñ gurezāñ kabhī kabhī

mast-e-shabāb vo haiñ maiñ sarshār-e-ishq huuñ
merī ḳhabar unheñ hai na un kī ḳhabar mujhe

husn ke dañke kī dhuum jag meñ paḌī jā-ba-jā
kyuuñ na baje dil mane ishq kī naubat sadā

bulbul-e-shīrāz ne chhoḌ diyā ishq-e-gul
ġhuncha-dahan ko sunā baat meñ jab ḳhush-adā

kūcha-e-sarbasta-e-zulf meñ hairāñ hove
ishq-e-siyah-chashm kā jis kā hove rahnumā

ishq ke bīmār kuuñ kaam tabībāñ suuñ na.iiñ
vasl kī tabrīd bin aur nahīñ hai davā

us galī meñ jā rahe ho ishq hai rusvā jahāñ
soch lo phir soch lo pachhtāoge pachhtāoge

sharāb-e-ishq kā sāġhar diyā hai mujh ko saaqī ne
na uTThūñgā maiñ mahshar ko bhī apnī sargirānī se

hameñ vo raah batlā.ī hai ḳhizr-e-ishq ne 'aishī'
niahān-e-raftgāñ paidā hai jis meñ be-nishānī se

kuchh to hameñ haqīqat-e-shams-o-qamar khule
kis kaj-kulah ke ishq meñ phirte haiñ sar khule

kahtā huuñ rāz-e-ishq magar saath shart ke
kānoñ hī tak rahe na zabāñ ko ḳhabar khule