Tags-Ishq

zalzale kī sūrat meñ ishq vaar kartā hai
sochne samajhne meñ der kuchh to lagtī hai

jaan hai mol us kā ai ishq-e-javānī jaan le
naqd husn-e-yūsuf-sānī kā bai.āna huā

kiyā thā ishq ne tārāj jis sehn-e-gulistāñ ko
maiñ ab us par mohabbat ko nigahbāñ kar ke chhoḌūñgā

hai baḌā kufr tark-e-ishq-e-butāñ
apnā īmān ham na chhoḌeñge

husn ik dilrubā hukūmat hai
ishq ik qudratī ġhulāmī hai

jī na ghabrā.e tirā be-mashġhale
ishq kar le dil-lagī ke vāste

terī sūrat nigāhoñ meñ phirtī rahe ishq terā satā.e to maiñ kyā karūñ
koī itnā to aa kar batā de mujhe jab tirī yaad aa.e to maiñ kyā karūñ

husn aur ishq donoñ meñ tafrīq hai par inhīñ donoñ pe merā īmān hai
gar ḳhudā ruuTh jaa.e to sajde karūñ aur sanam ruuTh jaa.e to maiñ kyā karūñ

dayār-e-ishq meñ ham par karam kuchh aise huā
visāl-e-ġham kī suhūlat qadam qadam pe khulī

saaya sā husn ke ham-rāh hai ishq-e-bebāk
saath ye jins-e-ḳharīdār liye phirtī hai

ishq ḳhud apnī jagah maz.har-e-anvār-e-ḳhudā
aql is soch meñ gum kis ko ḳhudā kahte haiñ

'sher' kyā aql o junūñ kī mushtarak bazm-e-jamāl
'sher' kyā hai ishq o hikmat kā maqām-e-ittisāl

āshiq kī 'ābrū' hai ḳhvārī meñ jaan denā
nāmard vo kahāve jo ishq siiñ haTā hai

husn hī husn hai gulzār-e-junūñ meñ raqsāñ
ishq kā ālam-e-sad-rañg javāñ hai ki nahīñ

ishq vo kār-e-musalsal hai ki ham apne liye
ek lamha bhī pas-andāz nahīñ kar sakte

is ishq kī majbūrī nāseh pe khulī jab se
kar man.a-e-mohabbat kā irshād bahut royā

ishq meñ kaun batā saktā hai
kis ne kis se sach bolā hai

dhuup ruḳh par paḌī havas kī 'sahar'
uḌ ga.e ishq ke ḳhumār ke rañg

kyoñ raas mujh ko ishq bhī aayā nahīñ miyāñ
kyoñ sāmnā huā mirā hijr-e-qalīl se

koī kāfir hameñ samjhe ki musalmāñ samjhe
ham to ai ishq tujhe hāsil-e-īmāñ samjhe