Tags-Ishq

koī kyā samajh sakegā ye hai faiz-e-ishq jis ne
mujhe is tarah bigāḌā mujhe is tarah sañvārā

mujhe ilm is kā kyā thā mujhe kyā ḳhabar thī 'najmī'
ki mujhī ko phūñk degā mire ishq kā sharārā

rabt hai husn o ishq meñ bāham
ek dariyā ke do kināre haiñ

mujh ko manzūr nahīñ ishq ko rusvā karnā
hai jigar chaak magar lab pe hañsī hai ai dost

ishq kā ejaaz sajdoñ meñ nihāñ rakhtā huuñ maiñ
naqsh-e-pā hotī hai peshānī jahāñ rakhtā huuñ maiñ

mire asāsoñ meñ ḳhvāb aur hasrateñ niklīñ
'kabīr' ishq meñ merā bhī ehtisāb huā

tarāna chheḌ vo mutrib ki rūh-e-ishq chauñk uTThe
ḳharosh-e-nāla-e-ġham kyā jo soz-e-jism-o-jāñ tak hai

sarāpā aarzū ban kar kamāl-e-mudda.ā ho jā
vo nañg-e-ishq hai jo aarzū āh-o-fuġhāñ tak hai

hiddat-e-husn-e-nazar se bhī bachā kar ḳhud ko
ishq meñ risk uThāne kā bhī sochā jaa.e

ishq to yaar adāoñ ko nigal jaatā hai
husn-e-bebāk bachāne kā bhī sochā jaa.e

faroġh-e-ishq hai mahrūmiyoñ se
vafā-keshī ba-qadr-e-nā-rasī hai

ishq meñ bedād-e-rashk-e-ġhair ne maarā mujhe
kushta-e-dushman huuñ āḳhir garche thā bīmār-e-dost

dil meñ ḳhayāl-e-ishq thā mehmān kī tarah
armāñ sajā thā 'mīr' ke dīvān kī tarah

merī namāz-e-ishq ko shaiḳh samajh sakegā kyā
us ne dar-e-habīb pe sajda kabhī kiyā nahīñ

mujh se shurū-e-ishq meñ mil ke jo tum bichhaḌ ga.e
baat hai ye nasīb kī tum se koī gila nahīñ

ishq kī shaan marhabā ishq hai sunnat-e-ḳhudā
ishq meñ jo bhī miT gayā us ko kabhī 'fanā' nahīñ

ātish-e-ishq-e-balā aag lagā.e na bane
aur ham us ko bujhā.eñ to bujhā.e na bane

rah-o-rasm-e-ishq pe rakh nazar ho jahān-e-nau kā payāmbar
na to ahd-e-rafta ko yaad kar na fareb-e-charḳh-e-kuhan meñ aa

phir ahl-e-ishq kī taḳhlīq hotī hai pahle
junūñ kī aag meñ barsoñ ḳhamīr rahtā hai

haañ kabhī ḳhvāb-e-ishq dekhā thā
ab tak āñkhoñ se ḳhuuñ Tapaktā hai