Tags-Ishq

ye dard-e-ishq hai 'ālam' kisī ke bas meñ kahāñ
rahā rahā na rahā na gayā to nā hī gayā

ik qayāmat kā ghaav āñkheñ thiiñ
ishq tūfāñ meñ naav āñkheñ thiiñ

fasāna-e-ishq muḳhtasar hai qasam ḳhudā kī na bor honā
'firāq-gorakhpurī' kī ġhazleñ nahīñ maiñ tum ko sunā rahā huuñ

mire ahd ke hasīno vo nazar-navāz taare
mirā daur-e-ishq-parvar tumheñ nazr de rahā hai

haTe na apnī tabī.at se husn-o-ishq kabhī
hazār baar zamāne meñ inqalāb aayā

sunā.īñ kyā tumheñ nairañg-e-ishq kā qissa
tamām-umr na āñkheñ khulīñ na ḳhvāb aayā

ġhazab hai Thes lagnā ishq kī ḳhuddār fitrat ko
bas ai chashm-e-karam ab iltifāt-e-rā.egāñ kab tak

koshisheñ ham ne kiiñ hazār magar
ishq meñ ek mo'tabar na huī

kanīzoñ pe bhī aa saktā hai dil zill-e-ilāhī kā
nizām-e-ishq meñ shajara mujhe achchhā nahīñ lagtā

pahle-pahal to maiñ tirā yak-tarfa ishq thā
ab merā haal tujh se ziyāda ḳharāb hai

to ishq se miTā.eñge duniyā kī nafrateñ
'mishrā' jī aap Thiik haiñ māthā ḳharāb hai

ham sanam dam tire ishq kā bhar ga.e
jal ga.e bhun ga.e kaT ga.e mar ga.e

ishq un shahrī ġhazāloñ kā junūñ ko ab khiñchā
vahshat-e-dil baḌh ga.ī ārām-e-jāñ ram ho gayā

kahāñ ke ishq-o-mohabbat kidhar ke hijr o visāl
abhī to log taraste haiñ zindagī ke liye

kab kiyā maiñ ne ishq kā daavā
terā apnā gumān hai pyāre

sūfī-e-ishq kī masnad mire haath aa jaa.e
mere ahbāb agar mujh ko malāmat kar deñ

ishq hotā hai māntā huuñ maiñ
mujh ko ik baar ye huā bhī thā

rukā thā aur kahāñ kārvān-e-rāhat-e-ishq
phir us ke ba.ad vo shīrīñ-adā milā ki nahīñ

nutq qāsir hai bayāñ se vo mazā paate haiñ log
mujh se pūchho ishq meñ gum ho ke kyā paate haiñ log