Tags-Ishq

ham ishq meñ haiñ fard to tum husn meñ yaktā
ham sā bhī nahīñ ek jo tum sā nahīñ koī

pūchhā jo maiñ ne yaar se anjām-e-soz-e-ishq
shoḳhī se ik charāġh ko us ne bujhā diyā

shauq ke hāthoñ ai dil-e-muztar kyā honā hai kyā hogā
ishq to rusvā ho hī chukā hai husn bhī kyā rusvā hogā

tum bhī 'majāz' insān ho āḳhir laakh chhupāo ishq apnā
ye bhed magar khul jā.egā ye raaz magar ifshā hogā

tujh ko pā kar bhī na kam ho sakī be-tābī-e-dil
itnā āsān tire ishq kā ġham thā hī nahīñ

ishq ko gesū-e-pechāk se bāñdhā gayā hai
aur phir gardish-e-aflāk se bāñdhā gayā hai

mas.ale husn ke bhī nāzuk haiñ
ishq hī ke muāmlāt nahīñ

husn se kā.enāt hai 'sāġhar'
ishq buniyād-e-kā.enāt nahīñ

kyuuñ yaad 'shamīm' aa jaate haiñ vo apnī mohabbat ke lamhe
jab ishq ke qisse suntā huuñ jab husn kī bāteñ hotī haiñ

ālam-e-husn-e-sādgī tauba
ishq khā khā ke pech-o-tāb uThā

chehroñ pe ḳhāmushī kī lau ruuh se ham-kalām haiñ
ya.anī jo ġharq-e-ishq haiñ un ko mire salām haiñ

ishq kī avvalīn shart hai kūcha-e-yār se nikal
hosh se be-niyāz ho bhuul jā sub.h-o-shām haiñ

juz ḳhūn-e-kohkan na uge vaañ se koī gul
shīrīñ kī rāh-e-ishq kī patthar zamīn hai

nahīñ hai kam zar-e-ḳhālis se zardi-e-ruḳhsār
tum apne ishq ko ai 'zauq' kīmiyā samjho

har jumbish-e-nazar hai rūdād-e-ishq 'aḳhtar'
haiñ be-zabāñ magar kuchh kahtī haiñ merī āñkheñ

ajab chalan hai ye bāzār-e-ishq kā ki yahāñ
chavannī chaltī hai rūpye meñ husn vāloñ kī

ishq kuuñ majnūñ ke aflātūñ samajh saktā nahīñ
go ki samjhāve pe samjhegā nahīñ aaqil hai ye

vahshī ishq-e-junūñ kam bhī nahīñ kartā hai
aur yuuñ bhī hai ki ab ram bhī nahīñ kartā hai

ab mirī baat jo maane to na le ishq kā naam
tū ne dukh ai dil-e-nākām bahut sā paayā

ham ne apnī sī kī bahut lekin
maraz-e-ishq kā ilaaj nahīñ