Tags-Ishq

jab tak ki ḳhuub vāqif-e-rāz-e-nihāñ na huuñ
maiñ to suḳhan meñ ishq ke bolūñ na haañ na huuñ

shatt-e-amīq-e-ishq ko ye chāhtā huuñ maiñ
abr-e-mizha se ro ke use be-karāñ karūñ

maiñ ne kitnā dil ko samjhāyā ki ab bhī ishq se
baaz aa dil baaz aa dil haa.e dil afsos dil

so na maanā dil ne aur saude meñ āḳhir ishq ke
yuuñ divāna ho gayā dil haa.e dil afsos dil

'momin-miyāñ' ye kaam nahīñ hai ye ishq hai
kyā soch meñ paḌe ho karūñ yā karūñ nahīñ

aql mahñgī hai bahut ishq ḳhilāf-e-tahzīb
dil ko is ahd meñ ham kaam meñ lā hī na sake

ishq kāmil hai usī kā ki patañgoñ kī tarah
taab nazzāra-e-ma.asūq kī lā hī na sake

haañ ai ġham-e-ishq mujh ko pahchān
dil ban ke dhaḌak rahā huuñ kab se

tire nisār zaḳhm-e-ishq kuchh vo lazzateñ milīñ
balā.eñ le rahā hai dil ḳhadañg-e-jāñ-shikār kī

mahsūs ho rahā hai ik jaal meñ huuñ kab se
ye ishq hai ki daldal āñkhoñ meñ bhī namī hai

'ġhālib'-e-dānā se pūchho ishq meñ paḌ kar salīm
ek ma.aqūl aadmī kaise nikammā ho gayā

jab ishq sikhātā hai ādāb-e-ḳhud-āgāhī
khulte haiñ ġhulāmoñ par asrār-e-shahanshāhī

ishq phir ishq hai āshufta-sarī māñge hai
hosh ke daur meñ bhī jāma-darī māñge hai

ġhurūr-e-husn na kar jazba-e-zuleḳhā dekh
kiyā hai ishq ne yūsuf ġhulām āshiq kā

vafūr-e-ishq ko āshiq hī jāntā hai 'nasīr'
har ik samajh nahīñ saktā kalām āshiq kā

allāh-re jazb-e-ishq ki husn-e-nigāh-e-qais
ik naqsh ban ke parda-e-mahmil meñ rah gayā

naala to ḳhair nañg-e-ġham-e-ishq thā magar
naġhma bhī soz-o-sāz kī mahfil meñ rah gayā

zamīn oḌh ke so.e haiñ sāhibān-e-ishq
ab us galī ke darīche nahīñ khulā karte

jagah na dete kisī ḳhauf ko kabhī dil meñ
kisī se ishq jo karte to barmalā karte

kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai