Tags-Ishq

zindagī kā diyā huā chehrā ishq-dariyā meñ dho ke aa.e haiñ
'farhatūllāh'-ḳhāñ ga.e the vahāñ farhat-ehsās ho ke aa.e haiñ

husn se va.ada-ḳhilāfī ishq se taubā kareñ
diin ke bhī hoñ bure duniyā ko bhī rusvā kareñ

kam se kam aisī to kuchh tadbīr kar ai jazb-e-ishq
vo hameñ dekheñ na dekheñ ham unheñ dekhā kareñ

ik zamāna ho rahā hai ishq meñ ham se ḳhilāf
kis ke kis ke dil meñ dil Dāleñ ilāhī kyā kareñ

rutba-dāñ thā jabīn-e-ishq kā maiñ
husn ke dar pe jab.ha sā na huā

na ishq hai vo na ġhālib na āstāñ na vafā
usī ke saath hī qisse bhī sañg-o-sar ke ga.e

dekhnā dekhnā kyā dil meñ lagī ātish-e-ishq
kyuuñ mirā nāla-e-ḳhūñ-bār sharar-bār hai aaj

jab sar meñ nahīñ ishq to chehre pe chamak hai
ye naḳhl ḳhizāñ aa.ī to shādāb huā hai

kabhī shab ko akelā jo pā.ūñ tujhe to gale se phir apne lagā.ūñ tujhe
kabhī chhātī pe apnī sulā.ūñ tujhe mujhe ishq ke jaur-o-jafā kī qasam

chhāne haiñ tire ishq meñ āshufta-sarī ne
duniyā-e-musībat ke bayābān hazāroñ

shurū-e-ishq meñ un se hī kuchh hijāb na thā
kabhī kabhī to ḳhud apne se bhī hayā aa.ī

bahut aañsū bahā.e chāhatoñ kī ibtidā meñ
baḌī mushkil se ham par ishq ke ādāb utre

jaane ye ishq hai yā koī karāmat apnī
chāñd le kar chale aa.e haiñ tirī galiyoñ meñ

intizār-e-hashr kar sakte nahīñ nākām-e-ishq
aaj hī ho jaa.e honā ho jo kal anjām-e-ishq

ibtidā meñ dard-e-furqat maut hai anjām-e-ishq
ahl-e-dil ko nā-muvāfiq hai havā-e-bām-e-ishq

be-ḳhudī meñ DabDabā aa.e haiñ aañsū aañkh meñ
al-madad ai zabt chhalkā chāhtā hai jām-e-ishq

us kī ulfat ne kiyā rusvā-e-ālam kis qadar
uñgliyāñ uThtī haiñ jaate haiñ jidhar badnām-e-ishq

kyoñ nasīhat meñ tirī nāseh haiñ ye dil-sozīyāñ
kyā tire dil par guzarte haiñ mire ālām-e-ishq

chashm-e-giryāñ qalb-e-nālāñ kī shamātat qahr hai
donoñ mil kar ik mujhī ko dete haiñ ilzām-e-ishq

hasrateñ bhī aaj dil ke saath hī dam toḌ deñ
aage pīchhe saath vāloñ kā na ho anjām-e-ishq