Tags-Ishq

ishq bahut sachchā hai ham
taare toḌ ke laate haiñ

is husn-parastī kā yahī hashr hai honā
kul umr mirī ishq meñ barbād rahegī

nāvak-e-nāz tirī ḳhair ki ishq-e-ḳhush-nūd
ḳhud-numā.ī ke liye ḳhūn-e-jigar kar aayā

kūcha-e-ishq meñ jaanā na kabhī bhuul ke tum
hai vahāñ āb-e-dam-e-teġh kā har jā chhiḌkāv

ishq kā raaz na kyuuñ dil se numāyāñ ho jaa.e
kaash ye bhī kisī nākām kā armāñ ho jaa.e

terā karam rahā jo rah-e-ishq meñ sanam
ik roz aa mileñge tire kārvāñ se ham

vaise to mire ishq kā har naqsh hasīñ thā
jab dard ne khīñchī to ye tasvīr hilā dī

aql hai bil-maslahat be-ai.tmādi kī ravish
ishq hai be-sāḳhta īmān le aane kā naam

paḌī hai sunsān dil kī vaadī akelā mahv-e-talāsh huuñ maiñ
ki ishq ke rāh-rau kidhar haiñ vafāoñ kā qāfila kahāñ hai

kitāb-e-zīst meñ mushkil hai bāb-e-ishq 'nadīm'
ham aise baab kī takmīl karnā chāhte haiñ

is ishq meñ na pūchho hāl-e-dil-e-darīda
tum ne sunā to hogā vo sher 'mus.hafī' kā

ranj-o-ġham ishq-o-junūñ dard-o-ḳhalish soz-o-firāq
aise aise mile 'ḳhāvar' hameñ dam-sāz ki bas

apne dukh meñ ronā-dhonā aap hī aayā
ġhair ke dukh meñ ḳhud ko dukhānā ishq meñ sīkhā

na hai vasl kī koī aarzū na to hijr kī koī guftugū
jo shikār ho ġham-e-ishq kā usī rāz-dāñ kī talāsh hai

sādgī dekh ishq meñ us ke
ḳhvāhish-e-jān shaad hai ham ko

ishq baat kartā hai dil tavāf kartā hai
ird-gard phirne se āshiqī nahīñ hotī

ishq vāloñ kī fuġhāñ zabt-e-fuġhāñ hotī hai
āshiq-e-vaqt ko ye baat batā dī jaa.e

ai qalandar aa tasavvuf meñ sañvar kar raqs kar
ishq ke sab ḳhārzāroñ se guzar kar raqs kar

aql kī vus.at bahut hai ishq meñ fursat hai kam
aql kī ayyāriyoñ ko darguzar kar raqs kar

haiñ kahāñ ishq meñ ghar-bār luTāne vaale
ḳhū-e-īsār se maġhlūb haiñ ansār ab bhī