Tags-Ishq

ye ishq kī galiyāñ jin meñ ham kis kis aalam meñ aa.e ga.e
kahtī haiñ ki hazrat ab kaise tum aaj yahāñ kyuuñ paa.e ga.e

mujhe dhun ki kākul-e-zindagī jo bikhar ga.ī hai sañvār duuñ
tumheñ ġham ki ishq ke tazkire mire sher-o-fan se chale ga.e

husn agar zūd-pashemāñ hai to hogā lekin
ishq bhī zūd-pashemāñ ho zarūrī to nahīñ

ye ajab nahīñ ki junūn-e-ishq
sar-e-dār thā sar-e-dār hai

hazār ḳhvāb mirī milkiyat meñ shāmil the
maiñ tere ishq meñ sarmāya-dār ban ke rahā

ishq meñ maiñ bhī bahut mohtāt thā sab jhuuT hai
aur ye sābit kar gayā kal raat kā ronā mirā

ishq meñ ḳhud se mohabbat nahīñ kī jā saktī
par kisī ko ye nasīhat nahīñ kī jā saktī

manzil-e-ishq kī rāheñ haiñ bahut hī dushvār
har qadam par na.e āzār nazar aate haiñ

terī bastī ko ḳhudā ishq se ābād rakhe
jis ne ābād rakhā hai mujhe vīrānī meñ

tumhāre ishq meñ ham nañg-o-nām bhuul ga.e
jahāñ meñ kaam the jitne tamām bhuul ga.e

yuuñ dil hamārā ishq kī ātish meñ ḳhush huā
bhun kar tamām aag meñ khiltā hai juuñ chanā

ḳhudā se ishq kī pahlī hasīñ nishānī hai
vo ik namāz ki jis meñ ḳhayāl-e-hūr nahīñ

ishq hai tarz o taur ishq ke ta.iiñ
kahīñ banda kahīñ ḳhudā hai ishq

ishq ne dā.era banā rakkhā
raqs meñ phir mujhe sadā rakkhā

ishq meñ āshnā parastoñ ne
ik sanam ek hī ḳhudā rakkhā

is na.e shahr kī is bhiiḌ meñ ai hazrat-e-ishq
jāntā kaun hai ab tum ko miyāñ mere sivā

ḳhush bhī ho lete haiñ tere be-qarār
ġham hī ġham ho ishq meñ aisā nahīñ

husn ko bhī ishq kī zid rakhnī paḌtī hai kabhī
tuur par muusā se milne kā payām aa hī gayā

der tak bāb-e-haram par ruk ke ik majbūr-e-ishq
sū-e-but-ḳhāna ḳhudā kā le ke naam aa hī gayā

rah-e-ishq meñ ġham-e-zindagī kī bhī zindagī safarī rahī
kabhī nazr-e-ḳhāk-e-safar rahī kabhī motiyoñ se bharī rahī