Tags-Ishq

kahte haiñ kis ko ishq mujhe ye ḳhabar nahīñ
ik mīThā mīThā dard mere dil ke paas hai

dil Duub jā.egā mirā bārish meñ pyaar kī
sailāb-e-ishq aane kī shāyad shunīd hai

saare bayān-e-ishq meñ mere ḳhilāf haiñ
tum ko nahīñ milegī sazā mutma.in raho

dil-o-dimāġh ko ro lūñgā aah kar lūñgā
tumhāre ishq meñ sab kuchh tabāh kar lūñgā

ab bahar-sūrat sar-e-maidāñ utarnā hai mujhe
kār-zār-e-ishq se paspā.ī kī sūrat nahīñ

ishq par faa.ez huuñ auroñ kī tarah lekin mujhe
vasl kā lapkā nahīñ hai hijr se vahshat nahīñ

matā-e-ishq zarā aur sarf-e-nāz to ho
tazzī-e-umr kā āḳhir koī javāz to ho

kitne dīvānoñ ko farzāna kiyā hai tū ne
kitne farzānoñ ko tujh ishq ne majzūb kiyā

ishq ne jab bhī kisī dil pe hukūmat kī hai
to use dard kī me.arāj ināyat kī hai

hameñ kushtagān-e-hayāt se haiñ junūn-e-ishq kī azmateñ
kabhī hañs paḌe tah-e-teġh ham kabhī jhuum uThe sar-e-dār ham

tamām umr kī āvārgī bajā lekin
lagā hai ishq kā ilzām kuchh ziyāda hī

ye mere ishq kī majbūriyāñ ma.āz-allāh
tumhārā raaz tumhīñ se chhupā rahā huuñ maiñ

zamīñ se āsmāñ tak āsmāñ se lā-makāñ tak hai
ḳhudā jaane hamāre ishq kī duniyā kahāñ tak hai

niyāz-o-nāz kī rūdād-e-husn-o-ishq kā qissa
ye jo kuchh bhī hai sab un kī hamārī dāstāñ tak hai

ham itnā bhī na samjhe aql khoī dil gañvā baiThe
ki husn-o-ishq kī duniyā kahāñ se hai kahāñ tak hai

khulā ki ishq nahīñ hai kuchh aur is ke sivā
razā-e-yār jo ho apnā haal kar rakhnā

ishq meñ qadr-e-ḳhastagī kī ummīd
ai 'jigar' hosh kī davā kījiye

karte raheñ vābasta un se chāhe jo afsāne log
ishq meñ rusvā.ī kī parvā karte haiñ kab dīvāne log