Tags-Ishq

ishq ke māroñ ko kahnā nahīñ dekho kuchh bhī
aur agar kahnā hī chāho to qalandar kahnā

kyā ishq ke uljhe jaade haiñ manzil kā kahīñ par naam nahīñ
taqdīr hai aur tadbīr nahīñ āġhāz hai aur anjām nahīñ

mast-e-ishq-e-shah-e-ḳhādim huuñ maiñ 'āsim' yaksar
jis ne baḳhshā hai mujhe bāda-e-irfāñ kā ayāġh

ratb-o-yābis meñ hai tasarruf-e-ishq
aañkh dariyā hai dil jazīra hai

na parda kholiyo ai ishq ġham meñ tū merā
kahīñ na sāmne un ke ho zard rū merā

ḳhud ko na bhuul jā.ūñ to kyā sajda-e-vafā
allāh mere ishq ko dīvāngī bhī de

na koī jalvatī na koī ḳhalvatī na koī ḳhaas thā na koī aam thā
na koī husn thā na koī ishq thā na yahī naam thā na vahī naam thā

jo lage aag bhī to na ho zau-fishāñ jo bujhe sho.ala bhī to na uThe dhuāñ
na gila hijr kā na sila ishq kā ye vahī hukm thā jo mire naam thā

kyuuñ nahīñ ishq bhalā har-kas-o-nā-kas kā shi.ār
is tijārat meñ agar itne ḳhasāre nahīñ the

ishq ne rāh-e-vafā samjhā.ī samjhāne ke ba.ad kahā
vaqt paḌā to jaanā hogā rāhguzar se aage bhī

aatā nahīñ samajh meñ ki kahte haiñ kis ko ishq
ik purze par ye harf judā likh rakheñge ham

mizāj-e-ḳhas hai ahl-e-ishq kā jalne ke aalam meñ
jalātā hai jo in ko us kī ye tā.īd karte haiñ

jinheñ kuchh silsile meñ ishq ke tahqīq hāsil hai
vo kab majnūñ se har gumrāh kī taqlīd karte haiñ

kiyā hai ishq ne āzād do-jahāñ se hameñ
na kuchh yahāñ se ġharaz hai na kuchh vahāñ se hameñ

kuchh ishq ke nisāb meñ kamzor ham bhī haiñ
kuchh parcha-e-savāl bhī āsān chāhiye

jaatā rahā qalb se saarī ḳhudā.ī kā ishq
qābil-e-tārīf hai tere fidā.ī kā ishq

kaisī musībat hai ye gul ko ḳhamoshī kā shauq
bulbul-e-betāb ko harza-sarā.ī kā ishq

paḌ ga.ī bakne kī lat varna yahāñ tak na thā
vā.iz-e-nā-faham ko harza-sarā.ī kā ishq

kartā huuñ jo baar baar bosa-e-ruḳh kā savāl
husn ke sadqe se hai mujh ko gadā.ī kā ishq

tum ko ḳhudā ne diyā saarī ḳhudā.ī kā husn
mujh ko atā kar diyā saarī ḳhudā.ī kā ishq