Tags-Ishq

bahr-e-zulmāt-e-junūñ meñ bhī nikal aa.ī hai raah
ishq ke haath meñ muusā kā asā ho jaise

mizāj-e-ishq ne ādāb-e-husn apnā.e
dayār-e-ishq meñ vo rasm-e-bandagī na rahī

paḌte rahe haiñ pech sadā rāh-e-ishq meñ
tadbīr ban ga.ī to vo taqdīr ban gayā

mire ishq par koī tohmat na dharnā
agar tum kaho ḳhud ko mansūr kar duuñ

agar mil sake mujh ko ashkoñ ke badle
ġham-e-ishq se ḳhud ko ma.amūr kar duuñ

ḳhuuñ ho ke ravāñ dil ho gar āñkhoñ se to behtar
yā ishq kī ātish meñ ye jal jaa.e to achchhā

nā-tavāñ ishq ne āḳhir kiyā aisā ham ko
ġham uThāne kā bhī baaqī nahīñ yaarā ham ko

husn-o-ishq kī taqdīr ik tazād bāham hai
un kī shaam bhī mahfil apnī sub.h bhī tanhā

ishq detā hai ḳhud ḳhabar apnī
le ke qāsid ḳhabar nahīñ aatā

is shahr meñ to kuchh nahīñ rusvā.ī ke sivā
ai 'dil' ye ishq le ke kidhar aa gayā tujhe

ātish-e-ishq ne ba-rañg-e-sipand
dāna-e-dil ko be-qarār kiyā

kis tarah samjhūñ mirā ishq hai sargarm-e-safar
raah bedār huī hai na kahīñ sham.a jalī

jo suud o ziyāñ kī fikr kare
vo ishq nahīñ mazdūrī hai

ishq afsurda nahīñ aaj bhī afsurda bahut
vahī kam kam asr-e-soz-e-nihāñ hai ki jo thā

aaj bhī said-gah-e-ishq meñ husan-e-saffāk
liye abrū kī lachaktī sī kamāñ hai ki jo thā

phir sar-e-mai-kada-e-ishq hai ik bārish-e-nūr
chhalke jāmoñ se charāġhāñ kā samāñ hai ki jo thā

vaqt kitne zor se hañsne lagā
ishq jab shartoñ pe āmāda huā

haa.e tark-e-ishq par us kā ye tanz
der hī se haañ magar achchhā huā

hikāyat-e-ishq se bhī dil kā ilaaj mumkin nahīñ ki ab bhī
firāq kī talḳhiyāñ vahī haiñ visāl kī aarzū vahī hai

ye to bas ik koshish sī thī pahle pyaar meñ rahne kī
sach pūchho to ham logoñ meñ kis ne ishq dobāra kiyā