Tags-Ishq

mohabbat hai azal ke din se shāmil merī fitrat meñ
bilā tafrīq shaiḳh o barhaman se ishq hai mujh ko

agar chehre hoñ afsurda to jiine kā mazā kyā hai
urūs-e-zindagī ke bāñkpan se ishq hai mujh ko

samajhtā huuñ use bhī ek manzil rāh-e-himmat kī
purānā halqa-e-dār-o-rasan se ishq hai mujh ko

saudā-e-ishq jab se mujh ko huā hai 'joshish'
ābādī-e-jahāñ ko vīrāna jāntā huuñ

ye log ishq meñ sachche nahīñ haiñ varna hijr
na ibtidā na kahīñ intihā meñ aatā hai

chalne kā hausla nahīñ ruknā muhāl kar diyā
ishq ke is safar ne to mujh ko niDhāl kar diyā

yaas o hirmāñ āh-e-sozāñ ashk-e-ḳhūñ dāġh-e-junūñ
hazrat-e-ishq aur kyā is ke sivā dene lage

ġham-e-ishq kī sunī dāstāñ to kaleja thaam ke yaar ne
ye kahā ki qissa ajiib thā mire dil ko us ne kuḌhā diyā

azal se tīra-baḳht-e-ishq ke hisse meñ aayā hai
shab-e-ġham-e-dil kā jal jal kar charāġh-e-tūr ho jaanā

har adāvat kī ibtidā hai ishq
ki mohabbat kī intihā hai ishq

lo zuleḳhā ko kab huā hai ishq
kis qadar tāqat-āzmā hai ishq

falak o mudda.ī o yaar o ajal
sab bhale haiñ magar burā hai ishq

dekhiye is kā hogā kyā anjām
ab ḳhudā se hameñ huā hai ishq

ho chukā ham se kuchh jo honā thā
tū ne ye haal kyā kiyā hai ishq

vāmiq-o-qais-o-kohkan kyā the
ajal-o-āfat-o-balā hai ishq

dekhnā shauq-o-sharm kā sheva
husn-e-ḳhud-bīñ hai ḳhud-numā hai ishq

kaun jaane thā us kā nām-o-numūd
merī barbādī se banā hai ishq

dil karo ḳhuuñ to kyā hai dildārī
jaan jaatī rahe to kyā hai ishq

ġham-zadā.ī meñ ġham-fazā kyā kuchh
dil-rubā yā na jāñ-rubā hai ishq

bā-vafā vo haiñ bevafā hai husn
bevafā ham haiñ bā-vafā hai ishq