Tags-Ishq

ishq ahl-e-vafā biich use qadr hai kyā ḳhaak
vo dil ki jo gard-e-rah-e-dildār na hove

is rāz-e-ishq ko kahīñ ro ro ke sham.a saañ
iz.hār kījiyo na 'jahāñdār' dekhnā

rindān-e-ishq chhuT ga.e maz.hab kī qaid se
ghanTa rahā gale meñ na zunnār rah gayā

gar ishq se vāqif mare mahbūb na hotā
hotā na maiñ mahjūr vo mahjūb na hotā

merī sī tarah ishq se hotā kabhī betāb
e.ajāz-numā sabr kā ayyūb na hotā

taqdīr meñ hai terī dahān-o-kamar kā ishq
sirr-e-nihāñ likhā hai mirī sarnavisht meñ

mohkme meñ ishq ke hai yaaro dīvāne kā shor
mere dil dene kā ġhul us ke mukar jaane kā shor

roz milne pe bhī lagtā thā ki jug biit ga.e
ishq meñ vaqt kā ehsās nahīñ rahtā hai

yaañ tak kiyā maiñ girya ki ḳhūbāñ ke ishq meñ
saath aabrū ke apnī ga.ī ābrū-e-chashm

banāyā ishq ne dariyā-e-nā-paidā-karāñ mujh ko
ye merī ḳhud-nigah-dārī mirā sāhil na ban jaa.e

aaj ḳhud husn ko dekhā hai sar-e-kūcha-e-ishq
dekheñ āġhāz koī taaza rivāyat hī na ho

ishq hī ḳhud hai ik jahāñ rasm-e-quyūd se alag
ishq sī koī shai nahīñ dāman-e-māh-o-sāl meñ

us dasht meñ mirā hī hayūlā thā har taraf
maiñ ne hī sham-e-ishq jalā lī koī na thā

ab ishq us maqām pe hai justujū-navard
saaya nahīñ jahāñ koī naqsh-e-qadam nahīñ

ishq-e-kāmil meñ to hājat amal-e-hub kī nahīñ
qais ma.ashūq banā ho ga.ī liilā āshiq

sargarm-e-shauq-o-huzūr nahīñ dil sard hai tū mahrūr nahīñ
jis qalb meñ ishq kā nuur nahīñ vo tāb-e-jalva-e-tūr nahīñ

jo ishq meñ bar-sar-e-dār huā sardār vahī sarshār huā
sarmast visāl-e-yār huā kis tarah kaheñ mansūr nahīñ

jo aap huā benām-o-nishāñ us ko hai milā vo jān-e-jahāñ
merāj-e-visāl hai us ko kahāñ jo ishq meñ chaknā-chūr nahīñ

sho.ala-e-ishq vo sho.ala hai ki allāh allāh
sadqe is naar ke maiñ nuur huā jaatā huuñ

ishq kī raah meñ manzil koī khoī hī nahīñ
kyā ḳhabar paas huuñ yā duur huā jaatā huuñ