Tags-Ishq

ba-ḳhudā ishq kā āzār burā hotā hai
rog chāhat kā burā pyaar burā hotā hai

ye vo kāñTā hai nikaltā nahīñ chubh kar dil se
ḳhalish-e-ishq kā āzār burā hotā hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jo mere gesuoñ kā giraftār to huā
maiñ bhī to tere ishq ke sāñche meñ Dhal ga.ī

maiñ jiyā ishq kī ik zinda alāmat ban kar
dāstāñ-goyoñ ne rātoñ ko sunāyā hai mujhe

huī dil meñ jab se hai shola-zan mirī ātish-e-ishq kī har nafas
jo patañg o sham.a meñ dekhiye na vo soz hai na gudāz hai

ba-ḳhudā ki muddat-e-ishq meñ yahī baat farz hai nāsehā
ki sanam ke naqsh-e-qadam sivā nahīñ sajda-gāh-e-namāz hai

na barābar us ko bhī zāhido gino apne ka.abe kī raah ke
rah-e-ishq meñ jo qadam rakho to bahut nasheb-o-farāz hai

koī shaġhl us se nahīñ bhalā ki 'muhib' ho ishq meñ mubtalā
usī rāh-e-haq kā bane rahnumā yahī ishq agarche majāz hai

maiñ ne qissa hī paak kar Daalā
ishq hogā na ḳhud-sarī rahegī

ai sajda-farosh-e-kū-e-butāñ har sar ke liye ik chaukhaT hai
ye bhī koī shān-e-ishq huī jis dar pe ga.e sar phoḌ liyā

ishq ke pahle pahle vaar se vo bhī TuuT ga.ī
ik jogī kā pyaar na aayā us laḌkī ko raas

dil ke andar naach rahe haiñ kitne shaah hasīn
mere ishq kī phūTī hai ab raushan laal kapās

ayyām ke har zikr se aur fikr se fāriġh
yā ishq hai vird-e-sahar-o-shām hamārā

hotā na farebanda-e-dil kaash ke 'hasrat'
āġhāz meñ ye ishq-e-bad-anjām hamārā

shikva o tanz se bhī kaam nikal jaate haiñ
ġhairat-e-ishq ko lekin ye gavārā bhī to ho

hai ġham-e-ishq meñ ik lazzat-e-jāved magar
is ġham-e-dahr se ai dil koī chārā bhī to ho

jalva-e-husn aur soz-e-ishq donoñ ek haiñ
sham.a kī lau thartharāne hī se parvāne bane

nāra-e-zulf-e-sanam shart-e-junūñ kyā ma.anī
dard rusvā hī sahī ishq jahāñgīr sahī

sāz-e-dil ko gudgudāyā ishq ne
maut ko le kar javānī aa ga.ī