Tags-Ishq

kar diyā zaar ġham-e-ishq ne aisā mujh ko
maut aa.ī bhī to bistar pe na paayā mujh ko

kabhī jañgal kabhī bastī meñ phirāyā mujh ko
aah kyā kyā na kiyā ishq ne rusvā mujh ko

dushman-e-jāñ huā dar-parda mirā jazba-e-ishq
muñh chhupāne lage vo jaan ke shaidā mujh ko

gudāz ishq se ma.amūr kar diyā mujh ko
muhāl hai tire ehsān se adā honā

musalsal kahte rahnā dard dil āñkhoñ hī āñkhoñ meñ
zabān ishq meñ 'nātiq' ise taqrīr kahte haiñ

kitnā mānūs sā ham-dardoñ kā ye dard rahā
ishq kuchh rog nahīñ thā jo davā.ī lete

qatra qatra sirf huā hai ishq meñ apne dil kā lahū
shakl dikhā.ī tab us ne jab āñkhoñ ko ḳhūñ-bār kiyā

ishq meñ kyā nuqsān nafā hai ham ko kyā samjhāte ho
ham ne saarī umr hī yaaro dil kā kārobār kiyā

ik husn-e-mukammal hai to ik ishq-sarāpā
hoshyār sā ik shaḳhs hai dīvāna sā ik shaḳhs

ab na vo josh-e-tamannā baaqī
ab na vo ishq kī vahshat hai mujhe

is jahāñ meñ sifat-e-ishq se mausūf haiñ ham
na karo aib hamāre hunar-e-zātī kā

ye zaḳhm-e-ishq hai koshish karo harā hī rahe
kasak to jā na sakegī agar ye bhar bhī gayā

ek muddat se huuñ maiñ munkir-e-ishq
aa mujhe kar de apnī haañ se ḳharāb

ishq kā sabr-o-tahammul hī se qaa.em hai vaqār
naala fariyād ḳhurāfāt meñ aa jaatā hai

ḳhidmat-e-ḳhalq se hotī hai ḳhudā kī ḳhidmat
ishq maḳhlūq-e-ibādāt meñ aa jaatā hai

jo hotā na maiñ kushta-e-ishq 'qaisar'
ye sūrat na hotī ye hālat na hotī

ba-sad aarzū jo vo aayā to ye hijāb-e-ishq se haal thā
ki hazāroñ dil meñ thiiñ hasrateñ aur uThānā aañkh muhāl thā

nāla-o-āh-o-fuġhāñ kyuuñ na huuñ hamdam apne
dostī ishq ko hai roz-e-azal se ham se

ishq kī lau ko maiñ bujhā aayā
ashk se phir ye dil jalā aayā

ham ne kab ishq ko samjhā hai tijārat jānāñ
ishq tum se hai ḳhasāra to ḳhasāra hī sahī