Tags-Ishq

fazā-e-lailā-e-shab meñ hai raushnī us kī
'ziyā'-e-naḳhvat-e-shīrīñ kā āftāb hai ishq

nisāb-e-ishq abhī tak hai māvarā-e-ḳhirad
ki tiis saal hue haiñ paḌhā.ī karte hue

garche hai tarz-e-taġhāful parda-dār-e-rāz-e-ishq
par ham aise kho.e jaate haiñ ki vo pā jaa.e hai

dobāra chāhtā thā ishq karnā
mujhe tū hī dobāra chāhiye thā

shikast-e-be-sutūn-o-mauj-e-jū-e-shīr shāhid haiñ
nahīñ āsān rāh-e-ishq kā hamvār ho jaanā

aaj anjuman-e-ishq nahīñ anjuman-e-ishq
kis darja kamī bazm meñ hai terī kamī se

is se to kahīñ baiTh rahe toḌ ke ab paaoñ
mil jaa.e najāt ishq ko is dar-ba-darī se

abhī na shaad ho takmīl-e-ishq par 'afqar'
abhī hai tark-e-mohabbat kā imtihāñ honā

koī dil sā dard-āshnā chāhtā huuñ
rah-e-ishq meñ rahnumā chāhtā huuñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ek bastī ishq kī ābād hai dil ke qarīb
lekin is bastī ke raste kis qadar pechīda haiñ

havas-e-ishq ke ahvāl baham karne ko
parda-e-sher meñ afsāna-nigārī aa.ī

kabhī be-qarār ho kar jo maiñ sāz-e-ishq chheḌūñ
to ye mushtarī-o-zohra koī giit phir na gaa.eñ

ġhurūr-e-husn-e-bātil par nazar hai
niyāz-e-ishq-e-kāmil dekhtā huuñ

jab tumhāre ishq meñ maiñ ne jalā.īñ uñgliyāñ
mere pāgal-pan pe tum ne bhī uThā.īñ uñgliyāñ

is aql kī maarī nagrī meñ kabhī paanī aag nahīñ bantā
yahāñ ishq bhī log nahīñ karte yahāñ koī kamāl nahīñ hotā

kuchh ishq kiyā kuchh kaam kiyā
vo log bahut ḳhush-qismat the

tū ne pahchān liyā ishq kī qadroñ kā mizāj
ye na pūchh aaj tirī bazm meñ kyā ho jaatā

ḳhuub phailī hai bū-e-bāda-e-ishq
shīsha-e-dil kahāñ kahāñ TuuTe

kufr-o-īmāñ do nadī haiñ ishq kiiñ
āḳhirash dono kā sañgam hovegā