Tags-Ishq

agar dil ishq ke anvār se ma.amūr ho jaa.e
to phir ye zarra ḳhud rashk-e-charāġh-e-tūr ho jaa.e

ġham sivā ishq kā ma.aal nahīñ
kaun dil hai jo pā.emāl nahīñ

ġham bhī hai kaif bhī hai soz bhī hai saaz bhī hai
ishq ik zinda haqīqat bhī hai ik raaz bhī hai

tuur kā vāqi.a phir az-sar-e-nau taaza kareñ
jalva-e-husn bhī hai ishq kā e.ajāz bhī hai

husn aur ishq se ġhāfil rahe mumkin hī nahīñ
naġhma-e-dil meñ kisī ke mirī āvāz bhī hai

kishvar-e-ishq kī rasmeñ ajab ulTī dekhīñ
saltanat karte haiñ sab dil ke churāne vaale

vāqif haiñ ham bhī ishq ke ādāb se magar
dīvāna ḳhud hī log banā.eñ to kyā kareñ

dekhnā bhī to unheñ duur se dekhā karnā
sheva-e-ishq nahīñ husn ko rusvā karnā

ye rab hī jaane ki vo ishq kis ko kis se kab
par ek baar to sab ko zarūr hotā hai

usūl-e-ishq kī takrār kā hai jis ko bhī
ziyāda pyaar usī kā qusūr hotā hai

haiñ ishq kī rāheñ pechīda manzil pe pahuñchnā sahl nahīñ
raste meñ agar dil baiTh gayā phir us kā sambhalnā mushkil hai

husn thā jab mastūr hayā meñ
ishq thā ḳhūn-e-dil kā rachāo

husn banā jab bahtī gañgā
ishq huā kāġhaz kī naav

pur-kaif kahīñ ke bhī nazāre na raheñge
duniyā meñ agar ishq ke maare na raheñge

ishq par iḳhtiyār hai kis kā
fā.eda pesh-o-pas meñ kuchh bhī nahīñ

jo haath dho chukā ḳhud zindagī se ai 'sho.ala'
namāz-e-ishq hai kyā us kī phir vuzū kyā hai

balā hī ishq lekin har bashar qābil nahīñ hotā
bahut pahlū haiñ aise bhī ki jin meñ dil nahīñ hotā

taḌapnā kis kā dekhoge jo zinda hoñ to sab kuchh ho
balā-e-ishq kā maarā kabhī bismil nahīñ hotā

duā de ishq ko ai zulm tū bhī zeb-e-pahlū hai
vagarna kaisā hī paikāñ ho lekin dil nahīñ hotā

haar jā.egī zindagī lekin
hārne kā nahīñ mirā ye ishq