Tags-Ishq

karūñ na kyuuñ husn kā nazāra sunūñ na kyuuñ ishq kā fasāna
isī kā to mashġhala thā barsoñ isī kā to valvala rahā hai

vo chāhtā thā khelnā mere hī jism se
phir darmiyān ishq ke aanā paḌā mujhe

kah rahī hai āj-kal ġhazleñ kisī ke ishq meñ
vo ki jo ḳhud zīnat-e-ash.ār honī chāhiye

ishq donoñ ne kiyā thā ḳhud-kushī bas maiñ karūñ
vo bhī marne ke liye tayyār honī chāhiye

dil kī nādānī hī bas kaafī nahīñ hai ishq meñ
aql bhī thoḌī bahut bīmār honī chāhiye

al-ġharaz ik na ik ġham-e-gul-o-ḳhār
falsafe kā ḳhumār ishq kā baar

is ishq-e-junūñ-ḳhez meñ kyā kyā nahīñ hotā
dīvāna hai jo qais se lailā nahīñ hotā

nāz-o-niyāz-e-ishq kā ḳhatm na ho ye silsila
'nāzish'-e-ḳhasta-hāl ko hañs hañs ke tū rulā.e jā

duniyā ham ahl-e-ishq pe kyuuñ pheñktī hai jaal
ham ne tire fareb meñ aanā to hai nahīñ

vo ishq to karegā magar dekh bhaal ke
'fāris' vo tere jaisā divāna to hai nahīñ

hai razā-e-dost meñ shāmil junūn-e-ishq bhī
chāhe kuchh kiije mujhe to hosh aa saktā nahīñ

ab ishq-e-navardī hī Thikāne se lagā.e
sho.ala na jalā.e mujhe girdāb uchhāle

ain dānā.ī hai 'nāsiḳh' ishq meñ dīvāngī
aap saudā.ī haiñ jo kahte haiñ saudā.ī mujhe

ishq ko salīqe se kuchh hamīñ ne bartā hai
varna qurbatoñ meñ yuuñ kis ne fāsla rakkhā

duniyā ho āḳhirat ho vo sab ko sañvār de
taufīq-e-ishq jis ko bhī parvardigār de

jalva hai be-ḳhudī-talab ishq hai himmat-āzmā
dīda-e-mast yaar se aañkh milā ke bhuul jā

laus-e-talab ke nañg se ishq ko be-niyāz rakh
ho bhī jo koī aarzū dil se miTā ke bhuul jā

taqsīr-vār-e-ishq jo hotā hai koī zab.h
karte haiñ afv jurm ke un se ishāre log

ai muqallid bul-havas ham se na kar dāvā-e-ishq
daaġh laala kī tarah rakhte haiñ mādar-zād ham

tū hī pukār mirā naam le ke ai ġham-e-ishq
paḌā hai vaqt ġham-e-rozgār meñ gum huuñ