Tags-Ishq

haath us ke na aayā dāman-e-nāz
ishq ko sunte hī the dast-darāz

'nabīl' is ishq meñ tum jiit bhī jaao to kyā hogā
ye aisī jiit hai pahlū meñ jis ke haar chaltī hai

hijr meñ tere shams o qamar kī aañkh lage kyā lail-o-nahār
charḳh ke kab gahvāre meñ ye ishq ke maare sote haiñ

iltifāt-e-nigah-e-nāz se bach kar rahnā
jazba-e-ishq tire qatl kī tayyārī hai

kaun kis kī ishq ke zindāñ meñ ġham-ḳhvārī kare
ḳhūn-e-dil letā hai mere piine khāne kī ḳhabar

lākhoñ dhaḌke ibtidā-e-ishq meñ
dhyān haiñ āġhāz meñ anjām ke

TuuT kar ishq kiyā hai bhī nahīñ bhī shāyad
mujh se ye kaam huā hai bhī nahīñ bhī shāyad

āshiqoñ ke liye hai daar hī dāru-e-shifā
ishq kī tib meñ davā naam hai bīmārī kā

ajal istāda hai bālīñ pe marīz-e-ġham-e-ishq
aañkh to khol zarā vaqt hai bedārī kā

tū rāste bichhā na charāġhoñ se lau tarāsh
ye ishq ehtimām se aage kī baat hai

imārat ishq kī tanhā khaḌī hogī kahāñ tum se
hameñ bhī saath rakkho ham haiñ naqsha dekhne vaale

ye ishq ke ḳhutūt bhī kitne ajiib haiñ
āñkheñ vo paḌh rahī haiñ jo tahrīr bhī nahīñ

ishq meñ chāñd-sitāroñ kī haqīqat kyā ho
jalva-e-yār pe qurbān sahar hotī hai

jazba-e-ishq meñ jannat kī tamannā kaisī
ye bulandī to mirī gard-e-safar hotī hai

aur kyā hogī mire ishq kī me.arāj 'fanā'
zindagī yaar ke qadmoñ meñ basar hotī hai

namāz-e-ishq tumhārī qubūl ho jaatī
agar sharāb se tum ai 'ratan' vazū karte

ai dil ye rāh-e-ishq hai rāh-e-ḳhirad nahīñ
is par qadam baḌhā tū zarā dekh bhaal kar

phir ishq bazm-e-husn kī jānib ravāñ hai aaj
dīvāngī ko aql ke sāñche meñ Dhaal kar

har ghaḌī baḌhtī huī tishna-labī ishq tirī!
dil ke riste hue zaḳhmoñ se bujhātā huā maiñ

dasht kī āvārgī ho chāk-dāmānī bhī ho
ishq hai dil meñ to vahshat kī farāvānī bhī ho