Tags-Ishq

ġhairat-e-ishq to kahtī hai ki ab aañkh na khol
is ke ba.ad ab na koī aur idhar se guzre

ai ishq sach to ye hai ki shīrīñ ne kuchh na kī
hasrat kā koh dil pe liye kohkan gayā

ishq bīnā.ī baḌhā detā hai
jaane kyā kyā nazar aatā hai mujhe

maiñ vādi-e-ishq meñ jo aayā
majnūñ ne mirī na ham-sarī kī

use kyuuñ sahar se nashāt ho use kyā malāl ho shaam se
jise ishq hai tire zikr se jise uns hai tire naam se

jo hayāt-e-ishq sañvar ga.ī to hayāt-e-husn nikhar ga.ī
kabhī tere husn-e-ḳhirām se kabhī mere soz-e-davām se

jo 'azīz-vārsī' thā kabhī vo 'azīz-vārsī' ab nahīñ
na junūn-e-ishq-e-butāñ hai ab na ġharaz hai bāda-o-jām se

ye to kaho kabhī ishq kiyā hai jag meñ hue ho rusvā bhii?
is ke sivā ham kuchh bhī na pūchheñ baaqī baat fuzūl miyāñ

khelne deñ unheñ ishq kī baazī kheleñge to sīkheñge
'qais' kī yā 'farhād' kī ḳhātir kholeñ kyā schōl miyāñ

dars-e-ilm-e-ishq se vāqif nahīñ mutlaq faqīh
nahv hī meñ mahv hai yā sarf hī meñ sarf hai

vo ishq jis kī zamāne ko bhī ḳhabar na rahī
tire bichhaḌne se rusvā nagar nagar meñ rahā

dil-e-sozāñ dikhānā jalva husn-o-ishq donoñ kā
kahīñ sham-e-shabistāñ aur kahīñ parvāna ban jaanā

navā-e-rāz sāz-e-ishq be-ḳhud kyuuñ na kar Daale
ki har parde se aatī hai sadā dīvāna ban jaanā

ye aalam beḳhūdī-e-ishq kā ai 'shauq' kyā kahiye
tasavvur meñ kisī ke aap se begāna ban jaanā

ba.ad mere na rahā ishq kī manzil kā nishāñ
miT ga.e rāh-rau o rāhguzar donoñ saath

guzārtā huuñ jo shab ishq-e-be-ma.āsh ke saath
to sub.h ashk mire nāshte pe girte haiñ

ishq kī ātish-e-ḳhāmosh hai kab se raushan
magar ehsās kā sho.ala hai ki jaltā hī nahīñ

ishq ke ġham-gusār haiñ ham log
husn ke rāzdār haiñ ham log

gar baazī ishq kī baazī hai jo chāho lagā do Dar kaisā
gar jiit ga.e to kyā kahnā haare bhī to baazī maat nahīñ