Tags-Ishq

mai-ḳhāna salāmat hai agar terī nazar kā
labrez ma-e-ishq se har jaam rahegā

kahāñ vo ḳhānumāñ-barbādi-e-ishq aur kahāñ ye ham
phirā karte haiñ yūñhī dar-ba-dar vaahī tabāhī se

tire vāste jaan pe kheleñge ham ye samā.ī hai dil meñ ḳhudā kī qasam
rah-e-ishq se ab na haTeñge qadam hameñ apne hī sidq-o-safā kī qasam

mire purze agarche uḌā.iyegā to gul-e-zaḳhm se mahkegī ishq kī bū
khiñche teġh tirī to ragaḌ duuñ gulū mujhe tere hī jaur-o-jafā kī qasam

lab-e-gor agarche judā.ī meñ huuñ magar ā.ina-e-dil kī safā.ī meñ huuñ
tirā mahv ḳhudā kī ḳhudā.ī meñ huuñ mujhe apne hī ishq-o-vafā kī qasam

ġham-e-daulat-e-vasl meñ ho ke hazīñ rah-e-ishq-o-vafā meñ haiñ ḳhāk-nashīñ
havas ab hameñ jāh-o-hasham kī nahīñ hameñ tere hī nashv-o-numā kī qasam

vo rū-e-kitābī to hai qur.ān hamārā
kahte haiñ jise ishq hai īmān hamārā

vaqt-e-namāz-e-ishq thā koī na pesh-o-pusht jab
ḳhud hī ko muqtadī kiyā ḳhud hī bane imaam bhī

mujh pe karam-navāziyāñ dasht kī baḌh na jaa.eñ kyuuñ
vālī-e-shahr-e-ishq huuñ us pe tirā ġhulām bhī

rassī se jhūltī huī laḌkī nahīñ hai ye
ye nā-murād-e-ishq hai laTkā huā hai aaj

butoñ ke ishq se ham baaz aa.e haiñ na ā.eñge
nahīñ parvā hameñ dushman agar saarī ḳhudā.ī hai

ishq ne ḳhud ruḳh-e-gulnār ko baḳhshā hai faroġh
varna kab apne banā.e se banī hai koī chiiz

jīteñge na ham se bāzī-e-ishq
aġhyār ke piT paḌeñge pāñse

ishq se tabī.at ne ziist kā mazā paayā
dard kī davā paa.ī dard-e-be-davā paayā

manzil-e-ishq na ḳhāk-e-shab-e-hijrāñ meñ milī
jāda-e-rañj meñ khiñchtā rahā naala merā

'nasīr' un kī samajh meñ bhī kuchh nahīñ aayā
jo aa rahe haiñ mujhe rāz-e-ishq samjhāne

dil ko qarār hai na to jaañ ko qarār hai
ye ishq hai ilāhī ki āzār ho gayā

ta.ajjub hai ki ishq-o-āshiqī se
abhī kuchh log dhokā khā rahe haiñ

ye jazb-e-ishq hai yā jazba-e-raham
tire aañsū mujhe rulvā rahe haiñ

usī ke ishq meñ jalnā mirī taqdīr Thahrī hai
mohabbat kī na.ī jo bastiyāñ ābād kartā hai