Tags-Ishq

'mardāñ' jo koī Duube dariyā-e-ishq meñ vo
chhoTe ḳhudī se apne hubb-e-vatan se nikle

safha-e-dil kuuñ daaġh kī kar mohr
ishq ke shaah ne diyā dastak

rahzan-e-aql siiñ nahīñ visvās
huuñ himāyat meñ ishq kī jab tak

ishq ke ik TimTimāte diip ne
dil ko raushan kar rakhā hai mustaqil

maz.haka aao uḌā.eñ ishq-e-be-buniyād kā
ik judā madfan banā.eñ tesha-e-farhād kā

ishq hai be-gudāz kyuuñ husn hai be-niyāz kyuuñ
merī vafā kahāñ ga.ī un kī jafā ko kyā huā

milāo ishq meñ kuchh rañj-e-rozgār se aab
bahut na bāda-e-ḳhālis jigar sambhālegā

kyā ishq ek zindagī-e-musta.ār kā
kyā ishq pā.edār se nā-pā.edār kā

vo ishq jis kī sham.a bujhā de ajal kī phūñk
us meñ maza nahīñ tapish o intizār kā

mujhe talāsh na kar tū ki ik zamāna huā
kitāb-e-ishq ke har baab se hazaf huuñ maiñ

makr-o-nifāq ishq se muddat talak rahā
maiñ dil se aur mujh se mirā dil alag alag

ye jagah ahl-e-junūñ ab nahīñ rahne vaalī
fursat-e-ishq mayassar kahāñ pahle vaalī

siine meñ rāz-e-ishq chhupāyā na jā.egā
ye aag vo hai jis ko dabāyā na jā.egā

jab raakh se uTThegā kabhī ishq kā sho.ala
phir pā.egī ye ḳhaak shifā aur tarah kī

kaam the ishq meñ bahut par 'mīr'
ham hī fāriġh hue shitābī se

kyā aur koī shahar meñ miltā nahīñ use
aa aa ke roz ishq hamāre gale paḌe

tirī baḳhshishoñ meñ hai sarvarī mire ishq ko de qalandarī
jo uThe to dast-e-duā lage mujhe aisā dast-e-savāl de

qalam-e-dār se tahrīr-e-rasan se ham ne
ik nayā moḌ diyā ishq ke afsānoñ ko

kāfirī ishq kā sheva hai magar tere liye
is na.e daur meñ ham phir se musalmāñ hoñge

mas.ala ro.eñge kis ko kyā kareñge ġham sabhī
is jahāñ meñ 'gīt' gar ye ishq āsāñ ban gayā