Tags-Ishq

hotā na agar ishq ko manzūr ye iz.hār
vahdat se ye kasrat ko sarokār na hotā

ishq donoñ taraf suuñ hotā hai
kyuuñ baje ek haat suuñ taalī

ishq kahte haiñ kise ye pochhiye mansūr se
jāñ-sapārī aur hai aur rāz-dānī aur hai

husn har shai ko diyā ishq milā har dil ko
taaki āsān ho insān kā insāñ honā

ishq meñ kuchh nahīñ davā se naf.a
kuḌhiye kab tak na ho balā se naf.a

ishq ko dil meñ chhupā lete haiñ kāmil kyūñkar
un par āsān huā kartī hai mushkil kyūñkar

kamāl-e-ishq kā yuuñ bhī kabhī andāz hotā hai
sū-e-parvāna sham.a chal ke ḳhud mahfil se aatī hai

vo jo dard thā tire ishq kā vahī harf harf-e-suḳhan meñ hai
vahī qatra qatra lahū banā vahī reza reza badan meñ hai

ye ishq-e-nā-murād bhī kis gumrahī meñ hai
khiḌkī meñ jo kabhī thā vo chehra galī meñ hai

nākām zindagī ho ki nākām ishq ho
jiine kī aarzū to mirī jaañ sabhī meñ hai

ḳhulūs jis meñ ho shāmil vo daur-e-ishq-o-havas
na rā.egāñ kabhī guzrā na rā.egāñ guzre

kahāñ kā husn ki ḳhud ishq ko ḳhabar na huī
rah-e-talab meñ kuchh aise bhī imtihāñ guzre

allāh allāh kyā ināyat kar ga.ī mizrāb-e-ishq
varna sāz-e-zindagī ko be-sadā samjhā thā maiñ

husn hai dād-e-ḳhudā ishq hai imdād-e-ḳhudā
ġhair kā daḳhl nahīñ baḳht hai apnā apnā

khaa.e hai is maze se ġham-e-ishq merā dil
jaise gurisna maare hai halvā-e-tar pe haath

bulā rahā hai kahīñ ishq sū-e-dār-o-rasan
pukārtā hai kahīñ husn-e-be-naqāb mujhe

kahtā hai ishq-e-dilbar furqat meñ ho na muztar
dil meñ guzar karūñgā āñkhoñ meñ ghar karūñgā

tujhe hogā us kā malāl kyā mujhe hogā us kā ḳhayāl kyā
tire husn se bhī kashish ga.ī mire ishq se bhī asar gayā

kiyā hai ham ne tayammum bhī ḳhāk-e-maqtal par
namāz-e-ishq paḌhī aur vuzū se duur rahe

ishq meñ dil ke ilāqe se guzartī hai bahār
dard ehsās tak aa.e to namī tak pahuñche