Tags-Ishq

ishq ko denā paḌā hai apnī sāñsoñ kā ḳhirāj
ye bhī tai hai is binā par maiñ ḳhasāre meñ nahīñ

ġhurūr-e-husn ko bātil samajh kar
sarāpā ishq ban jaayā kareñge

na jaane kaun sī manzil meñ ishq hai ki mujhe
mire hudūd se bāhar bulā rahā hai koī

nigāh-o-lab meñ hañsī kī sakat nahīñ lekin
ba-jabr-e-ishq-o-vafā muskurā rahā hai koī

vahī ek suud o ziyāñ kā ġham jo mizāj-e-ishq se duur thā
vo tirī zabāñ pe bhī aa gayā to lagan hī jī kī bikhar ga.ī

'shāz-jī' ishq meñ aisā hī huā kartā hai
tum hue qais hue donoñ Thikāne se ga.e

jab dil hī nahīñ hai pahlū meñ phir ishq kā saudā kaun kare
ab un se mohabbat kaun kare ab un kī tamannā kaun kare

maiñ mast alast faqīrnī nāchūñgī tire dvaar
mirī chhatrī ban jā sā.iyāñ mujhe apnā ishq navāz

jiinā marnā donoñ muhāl
ishq bhī hai kyā jī kā vabāl

'mus.hafī' ke dekh yuuñ chehre kā rañg
ishq ne kyā us kā naqshā kar diyā

kabhī apne ishq pe tabsire kabhī tazkire ruḳh-e-yār ke
yūñhī biit jā.eñge ye bhī din jo ḳhizāñ ke haiñ na bahār ke

ajab tarah ke jhamele haiñ ishq meñ sāhab
barat sako to ho ma.alūm aaTe daal kā bhaav

hamārī umr bhī guzrī hai is ḳharābe meñ
kahāñ ke hote haiñ ye log ahl-e-ishq haTāo

ek aisī bhī ghaḌī ishq meñ aa.ī thī ki ham
ḳhaak ko haath lagāte to sitārā karte

ek chehre meñ to mumkin nahīñ itne chehre
kis se karte jo koī ishq dobārā karte

na ro ishq meñ dasht-gardī ko majnūñ
abhī kyā huā hai bahut ḳhvār hogā

ishq meñ koī zamāñ aur na makāñ hotā hai
vo do-ālam se alag ek jahāñ hotā hai

sirf ik dil hī vo ma.abad hai vo ik ma.abad-e-ishq
jis meñ nāqūs ham-āvāz-e-azāñ hotā hai

husn ke haq se koī ohda-bar-ā kyā hogā
ishq kā haq bhī adā ham se kahāñ hotā hai

haa.e is ishq meñ insāñ kā javāñ mar jaanā
jaise kambaḳht isī din ko javāñ hotā hai