Tags-Ishq

mai-e-nashāt tirī sādgī ne chhalkā dī
nigāh-e-ishq ko kyā jaane kis kī pyaas rahī

hazāroñ dil diye josh-e-junūn-e-ishq ne mujh ko
siyah ho kar suvaidā ho gayā har qatra-e-ḳhūñ tan meñ

be-tāb haiñ aur ishq kā da.avā nahīñ ham ko
āvāra haiñ aur dasht kā saudā nahīñ ham ko

ishq kī garmī-e-bāzār kahāñ se lā.ūñ
yūsuf-e-dil kā ḳharīdār kahāñ se lā.ūñ

vahī shorīda-sarī hai vahī īzā-talabī
ishq meñ jāda-e-hamvār kahāñ se lā.ūñ

vajūd-e-ishq kī tārīḳh kā pata to chale
varaq ulaT ke tū arz o samā ke dekh zarā

kyā ishq kī manzil bhī hai kaḌī bañdh bañdh kar himmat TuuT ga.ī
jo ek qadam chal kar sambhlā vo do qadam aage jā ke girā

chāhiye thī sham.a is tārīk ghar ke vāste
ḳhāna-e-dil meñ charāġh-e-ishq raushan ho gayā

ḳhulūs-e-niyyat-e-rah-rau pe munhasir hai 'azīm'
maqām-e-ishq bahut duur bhī hai paas bhī hai

bil-āḳhir aaj merā zabt-e-ulfat rañg le aayā
mujhe hī jāñnisār-e-ishq-o-jāñbāz-e-vafā samjhe

hameñ le aayā is manzil meñ tere ishq kā jazba
ki ham har ek zarra maz.har-e-shān-e-ḳhudā samjhe

samajh se duur hai jāñ-dādgān-e-ishq kī manzil
fanā kī god meñ sarmāya-e-rāz-e-baqā samjhe

vo jo parvāne jale raat kī raat
manzil-e-ishq se āsāñ guzre

rishta-e-yād-e-butāñ TuuTā na tark-e-ishq se
hai haram meñ ab bhī zer-e-lab sanam-ḳhānoñ kī baat

abhī munkir-e-ishq hai ye zamāna
jo dekhā hai un ko dikhānā paḌegā

ishq kā duur kare dil se jo dhaḌkā ta.avīz
is dhaḌāke kā koī ham ne na dekhā ta.avīz

falsafa ishq kā asrār fan-o-hikmat ke
ḳhānqāhoñ se paḌheñ sīna-ba-sīna sīkheñ

apne hoñToñ kī dahaktī huī surḳhī bhar do
dāstāñ ishq kī be-rañg rahī hai barsoñ

ishq-e-nākām kī hai parchhā.īñ
shādmānī bhī kāmrānī bhī

aa.e tārīḳh-e-ishq meñ sau baar
maut ke daur-e-darmiyānī bhī