Tags-Ishq

'mushtāq' tere ishq kī hai dhuum āj-kal
ab qais-o-kohkan kī vo shohrat nahīñ rahī

sajā kar laḳht-e-dil se kashtī-e-chashm-e-tamannā ko
chalā huuñ bārgāh-e-ishq meñ le kar ye nazrāna

ishq-bāzoñ kī kahīñ duniyā meñ shunvā.ī nahīñ
in ġharīboñ kī qayāmat meñ samā.at ho to ho

har darje pe ishq kar ke dekhā
har darje meñ bevafā.iyāñ haiñ

thī ishq kī vo ibtidā jo mauj sī uTThī kabhū
ab dīda-e-tar ko jo tum dekho to hai girdāb sā

ai ishq tirī fat.h bahar-hāl hai sābit
mar kar bhī shahīdān-e-mohabbat hue ġhāzī

kab ishq meñ yāroñ kī pazīrā.ī huī hai
har kohkan o qais kī rusvā.ī huī hai

vo ishq kī zanjīr jo kaaTe nahīñ kaTtī
pairoñ meñ vo terī hī to pahnā.ī huī hai

jazba-e-ishq phir machaltā hai
Dhalte Dhalte ye chāñd Dhaltā hai

kis muñh se phir tū aap ko kahtā hai ishq-bāz
ai rū-siyāh tujh se to ye bhī na ho sakā

ishq bhī log numā.ish ke liye karte haiñ
kyā namāzeñ bhī paḌhī jaatī haiñ ayyārī se

'muhib' ke dil meñ dāġh-e-ishq kā kyūñkar na gul phūTe
ki detā hai bajā.e aab āñkhoñ se lahū ātish

mere siine pe zarā dast-e-hinā rakh do tum
dil meñ ab ishq kā ḳhurshed javāñ hai jānāñ

hikāyat-e-ishq se bhī dil kā ilaaj mumkin nahīñ ki ab bhī
firāq kī talḳhiyāñ vahī haiñ visāl kī aarzū vahī hai

ishq kī dastaras meñ kuchh bhī nahīñ
jān-e-man! mere bas meñ kuchh bhī nahīñ

hai vaqt-e-naz.a aur ġham-e-ishq duur duur
jaatā hai saath chhoḌ ke ye ham-safar kahāñ

bhuul kar bhī koī letā nahīñ ab nām-e-vafā
ishq is shahr meñ gardan-zadanī ho jaise

ham se qaa.em hai husn kī duniyā
ishq hai husn-e-zindagī ke liye

ishq ko dījiye junūñ meñ faroġh
dard se dard kī davā kījiye

ishq meñ tere jab bevafā.ī milī
tujh se milne kā ab aasrā na rahā