Tags-Ishq

guldasta-e-jihāt thā nairañg-e-rāh-e-ishq
thā ik tilism-e-husn-e-ḳhayābān-e-dām-e-shām

ishq kā rog un ke bas kā nahīñ
duur se vo salām karte haiñ

muhīt-e-ishq kī har mauj tūfāñ-ḳhez aisī hai
vo haiñ girdāb meñ jo dāman-e-sāhil meñ rahte haiñ

mujhe rāz-e-ishq ke zabt meñ jo maza milā hai na pūchhiye
mai-e-añgbīñ kā ye ghūñT thā ki gale se mere utar gayā

'sham.a' in āñsuoñ ko aahoñ ko
ishq in.aam likh diyā maiñ ne

hayāt-e-ishq ke ye pech o ḳham nasheb o farāz
inhīñ kā naam hai shāyad kisī kī añgḌā.ī

ishq tere tufail duniyā ke
tanzeñ sunte haiñ ta.ane khāte haiñ

ishq meñ sab hai behtarī dekh ba-chashm ghaḌī
rashk-e-qamar hai mushtarī-e-dīda-gah-e-farosh

kuchh milte haiñ ab puḳhtagi-e-ishq ke āsār
nāloñ meñ rasā.ī hai na aahoñ meñ asar hai

dil bhī nahīñ hai mahram-e-asrār-e-ishq dost
ye rāzdāñ bhī halqa-e-bairūn-e-dar hai aaj

husn-o-ishq kī an-ban kyā hai dil ke phañsāne kā phandā
apne hāthoñ ḳhud aafat meñ jā ke ye nā-māqūl paḌā

maktab-e-ishq se vābasta huuñ kaafī hai mujhe
dād-e-'ġhālib' sanad-e-'mīr' nahīñ chāhtī maiñ

faizyābī tirī sohbat hī se miltī hai mujhe
kab tire ishq kī tāsīr nahīñ chāhtī maiñ

qatl karnā to is ko Thiik nahīñ
ishq kī maut hādse meñ ho

us but ke liye maiñ havas-e-hūr se guzrā
is ishq-e-ḳhush-anjām kā āġhāz to dekho

ishq meñ vahshat kā ik sho.ala
ghar ko aag lagā saktā hai

gayā javānī kā saath sab kuchh vo garmi-e-ishq ab kahāñ hai
jo maiñ ne us vaqt aah kī hai bujhī huī aag kā dhuāñ hai

yahī haiñ ma.anī-e-ishq-e-kāmil ki sau balāoñ se huuñ muqābil
buland hai ab jo nāla-e-dil sipāh-e-andoh kā nishāñ hai

ishq meñ ab mil ga.ī hai mujh ko merāj-e-junūñ
ab to vo bhī kah rahe haiñ apnā dīvāna mujhe

ham-nafas merī to fitrat hī sanā-e-husn hai
ishq ke bande kahā karte haiñ dīvāna mujhe