Tags-Ishq

aur bhī kuchh sūrateñ ban jā.eñgī rusvā.ī kī
ishq meñ 'tābish' faqat tazlīl hī mumkin nahīñ

varam-e-dāġh ka.ī sāmne rakh kar us ke
ishq bolā ''ye uThā le tirī tamlīk hai dil''

jab ġhaur se sunte haiñ vo ishq kā afsāna
kis tarah machaltā hai merā dil-e-dīvāna

kāfir-e-ishq huuñ maiñ sab se mohabbat hai mujhe
ek but kyā ki samāyā hai kalīsā dil meñ

soz āvāz meñ lahje meñ khanak hai saaqī
ishq kā tere yaqīñ to nahīñ shak hai saaqī

ishq ke soz ne naġhmāt ko garmī baḳhshī
ab tire saaz meñ sho.aloñ kī lapak hai saaqī

ishq barbād-kun-e-rāhat-e-dil hai ki jo thā
shoḳhī-e-dost ba-andāz-e-digar hai ki jo thī

ye 'qais' kī masnad hai so zebā hai usī ko
hai ishq sarāsar mirī dānā.ī se aage

kisī ke ishq meñ dard-e-jigar se dil ye kahtā hai
idhar bhī aa nikalnā ham bhī haiñ ummīdvāroñ meñ

hamārā pyaar to thā chāñd aur chakore sā
tumhārā ishq hī gul se magas kā rishta thā

unheñ bhī ham ne sayyāroñ se vāpas aate dekhā hai
jahāñ bas ishq hotā hai koī īñdhan nahīñ hotā

siine meñ mire dāġh-e-ġham-e-ishq-e-nabī hai
ik gauhar-e-nāyāb mire haath lagā hai

hāsil-e-zīst ishq hī to nahīñ
chashm-o-abrū hī zindagī to nahīñ

ye qimār-e-ishq hai ai bul-havas baazī na jaan
sar ga.e bahutoñ ke aur bahutoñ ke is meñ ghar ga.e

mere jiine kā ye uslūb pata detā hai
ki abhī ishq meñ kuchh kaam haiñ karne vaale

phir nikal aa.e havasnākoñ ke raqsāñ tā.ife
dardmañd-e-ishq par ThaTThe lagāne ke liye

kāġhaz-e-abrī pe likh hāl-e-dil-e-pur-soz-e-ishq
gird us ke barq kī tahrīr khīñchā chāhiye

tan-e-lāġhar ba-rāh-e-ishq behtar hai bachā lā ke
kiyā muzġhe ne kyā hāsil agarche shakl moTī kī

ye zillat-e-ishq tere hāthoñ
ai dost tujhe kahāñ chhupā leñ

na ishq surme kā ne misī kā na shauq ġhamze kā ne hañsī kā
gumāñ ho gar tum ko aarsī kā so rū-ba-rū bhī nahīñ ga.ī hai