Tags-Ishq

mere ham-nafas mere ham-navā mujhe dost ban ke daġhā na de
maiñ huuñ dard-e-ishq se jāñ-ba-lab mujhe zindagī kī duā na de

ishq kī talḳh-kāmiyoñ ke nisār
zindagī kāmyāb kaun kare

qabr us kī pe lāzim hai ḳhum-e-mai kā chaḌhānā
jo mast ki ishq-e-but-e-mai-nosh meñ mar jaa.e

nahīñ uḌā.ūñgā ḳhaak royā nahīñ karūñgā
karūñgā maiñ ishq par tamāshā nahīñ karūñgā

use batāo farār kā naam to nahīñ ishq
jo kah rahā hai maiñ kār-e-duniyā nahīñ karūñgā

kyā tum ne bhī hai kal ratjagā kiyā
tumheñ bhī ishq ham se ho gayā kyā

us kaj-kulah-e-ishq ko ai mashq-e-sitam dekh
sar tan pe nahīñ phir bhī vahī sarv-qadī hai

na dekhī us ne kabhī lauh-e-dil pe abjad-e-ishq
to chashm-o-āri-o-lab se ġhazal bapā kar dī

mumkin nahīñ hai ishq kī baazī ko haar jaa.eñ
dil jaisī chiiz ham ne lagā.ī hai daav par

jī chāhegā jis ko use chāhā na kareñge
ham ishq o havas ko kabhī yakjā na kareñge

ye ishq nahīñ ye hai kam-bīnī o kam-aqalī
ik lutf-e-tabassum par itnā nahīñ itrāte

shurū-e-ishq meñ aisī udāsiyāñ 'tābish'
har ek shaam ye lagtā hai shaam āḳhirī hai

unheñ mafar na thā iqrār-e-ishq se lekin
hayā ko zid thī ki vo pās-e-ābrū karte

junūn-e-ishq kī tāsīr to ye thī 'aḳhtar'
ki ham nahīñ vo ḳhud iz.hār-e-ārzū karte

jām-e-ishq pī chuke zindagī bhī jī chuke
ab 'hilāl' ghar chalo ab to shaam ho ga.ī

maraz-e-ishq meñ piiTh apnī ye bistar se lagī
na kabhī saf.ha se jis shakl ho tasvīr judā

yahī to log masīhā haiñ zindagānī ke
hazār rahmateñ hoñ ishq ke marīzoñ par

sail-e-ishq thamā kab hogā
dariyā hai aur chaḌhtā sā hai

husn aur ishq haiñ donoñ kāfir
donoñ meñ ik jhagḌā sā hai

nigāh-e-ishq o chashm-e-husn do sāvan ke bādal hai
ye jab milte haiñ dil par ek bijlī sī barastī hai