Tags-Ishq

ishq janmoñ kā hai safar shāyad
ḳhatm hogā na umr bhar shāyad

huā 'zuhaib' dīvāna kisī ke ishq meñ dekho
galī-kūchoñ meñ phailegī ḳhabar āhista āhista

dūsroñ kā to zikr ishq meñ kyā
apne dil par bhī e.atibār na kar

ishq uftād-e-nā-gahānī hai
hādisa ye huā na thā pahle

ishq ham ne bhī to kiyā hai 'ziyā'
vaqt itnā burā na thā pahle

tāna-e-zulm-o-sitam lailā-o-shīrīñ pe abas
kyā kiyā aap ne ishq-e-dil-e-afgār ke saath

haa.e afsos hai 'sālik' kī javāñ-margī kā
ishq kī baat ga.ī us jigar-afgār ke saath

har ghaḌī pesh-e-nazar ishq meñ kyā kyā na rahā
merā dil bas tirī tasvīr kā dīvāna rahā

ye sitam mujh pe mire ishq kā achchhā na rahā
tujh ko dekhā to mirā dil mirā apnā na rahā

kisī jaade pe chalo chhoḌegī tanhā.ī na saath
qadam uTTheñ to kidhar ishq kī manzil ke ḳhilāf

'saudā' sharāb-e-ishq na kahte the ham, na pī
paayā mazā na tū ne ab us ke ḳhumār kā

garmi-e-ishq maane nashv-o-numā huī
maiñ vo nihāl thā ki ugā aur jal gayā

uñjho añkhiyāñ ke roġhan haiñ hamāre shola-e-dil kuuñ
bujhānā ishq kī ātish nahīñ hai kaam paanī kā

ik zamāna ho rahā hai ishq meñ ham se ḳhilāf
kis ke kis ke dil meñ dil Dāleñ ilāhī kyā kareñ

ye maqām-e-ishq hai kaun sā ye haiñ kaisī sabr kī manzileñ
na taḌap hai dil meñ na dard hai na sukūn hai na qarār hai

ye ajab masarrat-e-ishq hai jo ik ashk ban ke Tapak paḌī
ye 'sirāj' merā nasīb hai ki ḳhushī bhī ġham-ba-kanār hai

ham sar-phire bhī ḳhuub the ai 'dil' ki ishq meñ
nāmūs-o-nañg-o-nām bhī qurbān kar ga.e

qasam ḳhudā kī ye vāraftagī na thī mujh meñ
kisī ke ishq-e-salīqa-shi.ār se pahle

tohmat-e-ishq abas karte haiñ mujh ko 'minnat'
haañ ye sach milne kī ḳhūbāñ se to ik ḳhū sī hai

maiñ huuñ nākām ishq meñ lekin
kyā koī kāmyāb hai yaaro